ފޯޅަވައްސާ ދިމާލުން ގެއްލުނު ކަނޑު ހޯދަން އައި ސަރުކާރަށް ކުރެވުނުކަމެއް ނެތްކަމަށް ކުރީގެ ރައީސް ޔާމީން އަބްދުލްގައްޔޫމް ވިދާޅުވެއްޖެއެވެ.

ޕީއެންއެފް އިން ބޭއްވި ފްރަންޓު އޮފީސް ޖަލްސާގައި ވާހަކަފުޅު ދައްކަވަމުން އެމަނިކުފާނު ވިދާޅުވީ މި ސަރުކާރުން ވެރިކަމަށް އައީ ގެއްލުނު ކަނޑު ހޯދައިދޭނެ ކަމަށް ވައުދުވެގެން ކަމަށެވެ.

އެހެންނަމަވެސް ރައީސް ޔާމީން ވަނީ "ދަރިއަކު ދުނިޔެއަށް އުފަން ކުރާހާ މުއްދަތު ވެރިކަމަށް ފާއިތުވެގެން ދިޔައިރު" އެ ވައުދު ފުއްދަން ކުރެވުނީ ކޮން ކަމެއްތޯ ސުވާލު އުފައްދަވާފައެވެ.

މީގެއިތުރުން ސަރުކާރަށް ވަރަށްބޮޑަށް ފާޑުވިދާޅުވެ، އެމަނިކުފާނު ވަނީ ފޯޅަވަހީގެ ރަށްތަކުގެ ސިޔާދަތީ ބާރު މޮރިޝަސް އަށް ދޭން އިނގިރޭސިވިލާތުން އެއްބަސްވިކަން އިއުލާނު ކުރުމުން، ދެން މި ސަރުކާރުން ރައްޔިތުންގެ ކުރިމައްޗަށް އަރައި ދައްކަން އޮންނާނީ ކޮން މޫނެއްތޯ ވެސް ސުވާލު ކުރައްވާފައެވެ.

އެމަނިކުފާނު ވަނީ ފުރުސަތު ލިބުނު ނަމަވެސް ގެއްލުނު ކަނޑު ހޯދުމުގައި އެއްވެސް މަސައްކަތެއް މި ސަރުކާރުން ނުކުރާކަމަށް ވިދާޅުވެ، ނުރުހުންފާޅުކުރައްވާފައެވެ.