ސަފާރީއަކުން މޫދަށް ވެއްޓުނު ދިވެއްސަކު ގެއްލިގެން ހޯދަން ފަށައިފިއެވެ.

ދިވެހި ފުލުހުންގެ ހިދުމަތުން ވިދާޅުވީ އދ. ރިސޯޓެއް ކައިރީ އޮތް ސަފާރީއެއްގައި އުޅުނު ދިވެއްސަކު ގެއްލިގެން އެ އިދާރާ އަށް ރިޕޯޓް ކޮށްފައިވާ ކަމަށެވެ. އަދި އެ ރިޕޯޓުކުރީ މިއަދު ކަމަށެވެ.

އެއީ މިރިހި އައިލެންޑް ރިސޯޓް ކައިރީގައި އޮތް "ނޯތު 07" ނަމަކަށް ކިޔާ ސަފާރީ ކަމަށާއި އެ މައުލޫމާތު އެމްއާރުސީސީ އަށް ލިބުމާ ގުޅިގެން، ޑައިވަރުންގެ ޓީމަކާއެކު ސަފާރީ އޮތް ސަރަހައްދަށް ދިއުމަށް މާލެއިން ޓީމެއް މިހާރު ދަތުރުކުރަމުންދާ ކަމަށް ވަނީ ވިދާޅުވެފައެވެ.

ފުލުހުން މީޑިއާ އަށް ވިދާޅުވެފައިވަނީ ރޭގެ ވަގުތެއްގައި ސަފާރީގެ ޑެކް މަތީ ހުއްޓާ އަރުޝަދު ވެއްޓި ސަފާރީގެ އަރިމަތީގައި ޖެހި މޫދަށް ވެއްޓޭ މަންޒަރު ސަފާރީގެ ސީސީޓީވީ ފުޓޭޖުން ފެނިފައިވާ ކަމަށެވެ.

އޭނާ ހޯދުމުގެ މަސައްކަތް އެމްއެންޑީއެފް އާއި ފުލުހުން އެ ސަރަހައްދުގައި މިހާރު ދަނީ ހަރަކާތްތެރިވަމުންނެވެ.

ގެއްލިގެން ރިޕޯޓްކޮށްފައިވަނީ ނ. ހޮޅުދޫ، ސީވީޑު، ޢަލީ އަރުޝަދު ކަމަށާއި އޭނައަކީ އުމުރުން 35 އަހަރުގެ މީހެއް ކަމަށް ވިދާޅުވެފައި ވެއެވެ.