ހުޅުމާލޭގައި މިރޭ 3 މިނެޓަށް ހަވާ އަރުވާނެ ކަަމަށް އެމްއެންޑީއެފް އިން ވިދާޅުވެއްޖެއެވެ.

'އެކްސް' ގައި ކުރައްވާފައިވާ ޕޯސްޓެއްގައި ވަނީ ހަވާ އަރުވަނީ ހުޅުމާލޭ ސެންޓްރަލް ޕާކުގައި މިރޭ 9:30 ގައި ކަމަށެވެ. އަދި އެއީ ވިޔަފާރި އުސޫލުން ޕްރައިވެޓް އިވެންޓަކަށް ސިފައިންގެ ކޯޕަރޭޓިވް (ސިފްކޯ) އިން ކުރިއަށްގެންދާ ހަރަކާތެއް ކަމަށެވެ.

މި ހަރަކާތް ކުރިއަށް ދާނީ 3 މިނެޓެއް ހާއިރު ކަމަށް ވެސް އެ ޕޯސްޓުގައި ވެއެވެ.

ސިފްކޯ އިން ގެންދަނީ އައު އަހަރާއި މިނިވަން ދުވަހާއި ޖުމްހޫރީ ދުވަސް އަދި އީދު ދުވަސްތައް ފަދަ ހާއްސަ ދުވަސްތަކުގައި ހަވާއެރުވުމުގެ ހަރަކާތްތައް ކުރިއަށް ގެންދަމުންނެވެ. އަދި އަމިއްލަ ފަރާތްތަކުން ބާއްވާ އިވެންޓުތަކުގައި ވެސް ވިޔަފާރި އުސޫލުން ހަވާއަރުވާދެއެވެ.