އަނބިދަރީންނަށް ހަރަދު ކުރުމަކީ ތިބާއަށް އެކަމުން ދަރުމަ ލިބޭނެ ކަމެއް ކަމުގައި ހުކުރު ހުތުބާގައި ހަނދާންކޮށްދީފިއެވެ.

ހުތުބާގައި ވަނީ އަންހެނުންގެ ތެރޭގައި ހިމެނޭ ޝަރަފުވެރި އެއް ބަޔަކީ އަނބިމީހާ ކަމަށާއި މާތް ﷲ ވަނީ އަނބިމީހާއަށް ނަފަގާތު ދިނުމަށާއި ބޯހިޔާވަހިކަން ތަނަވަސްކޮށްދިނުމަށް ފިރިމީހާގެ މައްޗަށް އަމުރުކުރައްވާފައިވާ ކަމަށް ވެސް ހަނދުމަކޮށްދީފައެވެ.

މީގެއިތުރުން ތަފާތު މުނާސަބަތުތަކުގައި ތަފާތު ތަންތާނގައި އަނބިމީހާއަށް ހެޔޮކޮށް ހިތުމަށް މާތް ނަބިއްޔާ ވެސް ތަކުރާރުކޮށް އިރުޝާދު ދީފައިވާކަން ހަނދާންކޮށްދީ، ހަމަ އެހެންމެ އިސްލާމީ ޝަރީއަތުގައި ކަނޑައަޅުއްވައިފައިވާ ގޮތުން، ބައްޕަ އޭނާގެ ދަރީންނަށް ހަރަދުކުރުމަކީ، ފިރިހެން މީހާގެ މައްޗަށް މާތް ﷲ ވާޖިބުކުރައްވައިފައިވާ ކަމެއް ކަމުގައި ހުތުބާގައި ބުނެފައި ވެއެވެ.

އެހެންކަމުން ތިބާގެ އަނބިމީހާ ފުދުންތެރިއަކަށް ނުވަތަ މުއްސަންޖަކަށް ވީނަމަވެސް ތިބާ އޭނާއަށާއި ދަރީންނަށް ހަރަދުކުރާންޖެހޭނެ ކަމަށް ހުތުބާގައި ބުނެފައި ވެއެވެ.

"އެ މީހުންނަށް ކެއިންބުއިމާއި އަންނައުނާއި ބޯހިޔާވަހިކަން ތަނަވަސްކޮށްދޭން ޖެހޭނެއެވެ. މިއީ ފިރިމީހާގެ މައްޗަށް ވާޖިބުވެގެންވާކަމެވެ." ހުތުބާގައި ބުނެފައި ވެއެވެ.

ހަމަމިއާއެކު އަނބިދަރީންނަށް ރިޒުގު ތަނަވަސްކޮށްދިނުމަށް މަސައްކަތްކުރުމަކީ ﷲ ގެ މަގުގައި ޖިހާދުކުރުން ފަދަ ސަވާބު މަތިވެރި ކަމެއްކަން ފާހަގަކޮށް، އަނބިދަރީންނަށް ހަރަދު ކުރުމަކީ ތިބާއަށް އެކަމުން ދަރުމަ ލިބޭނެ ކަމެއް ކަމުގައި ވެސް ހަނދާންކޮށްދީފައި ވެއެވެ.