ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އިން މިއަހަރު ވެސް ބޭނުންކުރަނީ ފައިބެއަހަރު އެ ކުންފުނިން ތައާރަފްކުރި ޑިޖިޓަލް ކަލަންޑަރު ކަމުގައި ހާމަކޮށްފިއެވެ.

އެކުންފުނިން ވިދާޅުވީ ފައިބެއަހަރު އެ ކުންފުނީގެ ކަލަންޑަރު ތައާރަފްކުރީ އާންމު ހިންގުމުގައި ގެންގުޅޭ ސަސްޓެއިނަބިލިޓީ، އިނޮވޭޝަން، އަދި ޑިޖިޓަލް ޓްރާންސްފޮމޭޝަން ވިސްނުމުގެ ދަށުން ކަމަށެވެ. އަދި މިއަހަރު ވެސް ބޭނުންކުރުމަށް ނިންމާފައިވަނީ 'އެސްޓީއޯ ޑިޖިޓަލް ކަލަންޑަރު' ކަމަށެވެ.

"ސޮޕްޓްވެއަރ އަޕްޑޭޓާއެކު އަލުން ބޭނުންކުރުމަށް ވަނީ ނިންމާފަ. މި ބަދަލާ އެކު ކަލަންޑަރު އުފެއްދުމަށް ކަރުދާހަށް ކުރަން ޖެހޭ ހޭދައާ އައު ކަލަންޑަރު ޕްރިންޓުކުރުމަށް އަދި ޑިޒައިންކުރުމަށް ހޭދަވާއި ވަގުތާއި ފައިސާ ސަލާމަތްކުރެވޭނެ."

އެ ކުންފުނިން ވިދާޅުވީ މިއީ ކުންފުނީގެ ހިންގުމުގައި ގެންގުޅޭ ދެމެހެއްޓެނިވި ވިސްނުންތަކާއި އުސޫލުތަކާއެކު، އެސްޓީއޯގެ ޕޭޕަރލެސް ޕޮލިސީގެ ދަށުން ތިމާވެއްޓަށް ކުރާ އަސަރު ކުޑަކުރުމަށް ކުރަމުންދާ މަސައްކަތްތަކަށް އިތުރު ބާރުދިނުމަށް ނިންމާފައިވާ ނިންމުމެއް ކަމަށެވެ.

މީގެއިތުރުން މި ކަލަންޑަރުވާނީ އިތުރު ފަސޭހަތަކެއް ލިއްބައިދޭ, މަގުބޫލު ވަސީލަތަކަށްކަން ޔަގީންކުރާ ކަމަށް ވެސް ވިދާޅުވެއެވެ.

މިއަހަރަށް ކަލަންޑަރު އަޕްޑޭޓްކުރާނެ ގޮތް އެކުންފުނީގެ ވެބްސައިޓާއި މީސްމީޑިއާގެ އެކި މަންސަތަކުގައި ވަނީ އާންމުކޮށްފައެވެ. އެސްޓީއޯ އިން މީގެ ކުރިން އައީ ކޮންމެ އަހަރަކު 8000 ކަރުދާސް ކަލަންޑަރު އުފައްދަމުންނެވެ.