ބޯންމެރޯ ހަދަން މިއަހަރު ފޮނުވި ތިން ކުދިންގެ ފަރުވާ މުޅިން ފުރިހަމަކޮށްފައިވާ ކަމުގައި މޯލްޑިވްސް ބްލަޑް ސަރވިސް އިން ހާމަކުރައްވައިފިއެވެ.

މިކަން ހާމަކުރެއްވީ ޕީއެސްއެމްގެ ރާއްޖެމިއަދު ޕްރޮގްރާމުގައި ވާހަކަ ދައްކަވަމުން މޯލްޑިވިއަން ބްލަޑް ސަރވިސަސްގެ އެސޯސިއޭޓް ސްޕެޝަލިސްޓް އިން ޕީޑިއަޓްރިކް ޑރ. އަހުމަދު އުމަރުއެވެ.

އޭނާ ވިދާޅުވީ ޒަކާތު ފަންޑުގެ އެހީގައި ބޯންމެރޯ ހަދަން މިއަހަރަށް ކަނޑައެޅި ހުރިހާ ކުދިން ފަރުވާއަށް ގޮސްފައި ވާކަމަށެވެ. އަދި މިއަހަރުގެ އެކި ދުވަސްވަރު 14 ކުދިން ބޯންމެރޯ ހެދުމަށް ފޮނުވާފައިވާ ކަމަށެވެ.

މީގެއިތުރުން ފަރުވާ މުޅިން ފުރިހަމަކޮށް ތެލަސީމިއާއިން ފަސޭހަވެ، ދެ ކުއްޖަކު މިހާރު ރާއްޖެ އައިސްފައިވާކަން ފާހަގަކުރައްވައި ވިދާޅުވީ އިތުރު ކުއްޖަކު ވެސް ފަރުވާ ފުރިހަމަކޮށް، ކުރިއަށް އޮތް ދެ ހަފުތާގެ ތެރޭގައި ރާއްޖެ އަންނާނެ ކަމަށެވެ.

ޑރ. އުަމރު ވިދާޅުވީ މިއަހަރު ފޮނުވި ކުދިންގެ ތެރެއިން އެއް ކުއްޖަކު މިދިޔަ ހަފުތާގައި ނިޔާވެފައިވާ ކަމަށާއި ދެން ހިމެނޭ 10 ކުދިން ބޯންމެރޯ އޮޕަރޭޝަނަށް ފަހު އިތުރު ފަރުވާ ފުރިހަމަ ކުރަމުންދާ ކަމަށެވެ. އަދި ހުރިހާ ކުދިން ވެސް ފަރުވާ ފުރިހަމަކޮށް ކުރިއަށް އޮތް ނޮވެމްބަރު ނުވަތ ޑިސެމްބަރުގެ ތެރޭގައި ރާއްޖެ އަންނާނެ ކަމަށް ވަނީ ވިދާޅުވެފައެވެ.

ރާއްޖެއަކީ އާބާދީގެ ނިސްބަތުން ތެލަސީމިއާ އާބާދީ އެންމެ ބޮޑު ގައުމަކަށްވާއިރު، ރާއްޖޭގެ ތެލަސީމިއާ ދަފްތަރުގައި 959 މީހުން ވަނީ ރެޖިސްޓަރކޮށްފައެވެ. އޭގެތެރެއިން މިވަގުތު ދުނިޔޭގައި ތިބީ 666 މީހުންނެވެ.

ތެލަސީމިއާ މީހުންގެ ދެބައިކުޅަ އެއްބައި އާބާދީއަކީ މާލެ ސަރަހައްދުގައި ދިރިއުޅޭ މީހުންނެވެ.