ވަރލްޑްސް ބިގެސްޓް ގިވްއަވޭ ގެ ނަމުގައި މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) އިން ހާއްސަ ކެމްޕެއިނެއް ފަށައިފިއެވެ.

ޑަބްލިއުޓީއެމް ލަންޑަން ފެއަރގެ ތެރެއިން ލޯންޗުކުރި މި ކެންޕެއިންގައި މީސްމީޑިއާ މެދުވެރިކޮށް ކޮންމެ މަހަކު ބާއްވާ މި މުބާރާތްތަކުގެ ނަސީބުވެރި ފަރާތްތަކަށް ކޮންމެ ހަފްތާއަކު ވެސް ރާއްޖޭގައި ޗުއްޓީ ހޭދަކޮށްލުުމުގެ ފުރުސަތު ލިބޭނެއެވެ. އެގޮތުން ޖުމްލަ 52 ޗުއްޓީ ދަތުރު ދިނުމަށް ހަމަޖެހިފައިކަމަށް އެ ކުންފުނިން ހާމަކުރައްވައެވެ.

ކޮންމެ މުބާރާތެއްގައި ވެސް ރާއްޖޭގެ ރީތި ގޮނޑުދޮށްތަކާއި ސާފު މޫދާއި، ގުދުރަތީ ރީތިކަމުން ފެށިގެން ރާއްޖޭގެ މުއްސަނދި ސަގާފަތާއި ތަފާތު ކަނޑުގެ ދިރުންތައް ފަދަ އެކިއެކި ކަންކަމަށް އަލިއަޅުވާލާނެއެވެ. އަދި ލަގްޒަރީ، ފެމިލީ، ޑައިވިންގ އާއި އެހެނިހެން ހިތްގައިމު ތަފާތު ސެގްމެންޓްތަކަށް އަލިއަޅުވާލެވިގެންދާނެއެވެ.

"ދަ ވޯލްޑްސް ބިގެސްޓް ގިވްއަވޭ" ކެމްޕޭންގެ މައިގަނޑު މަގްސަދަކީ މީސްމީޑިއާގެ ޒަރީއްޔާއިން ބައިނަލްއަގްވާމީ ފަރާތްތަކުގެ ބައިވެރިވުމާއެކު ރާއްޖެއަށް ގިނަ ފަތުރުވެރިން އައުމަށް ޝައުގުވެރިކުރުވުމެވެ.

މި މުބާރާތްތަކުގައި ބައިވެރިވުމުން ފަތުރުވެރިންނަށް ރާއްޖޭގެ ތަފާތު ހިތްގައިމުކަން ދެނެގަނެ، ލިބޭ ތަފާތު ތަޖުރިބާތައް ހިއްސާކޮށް، ރާއްޖެއަކީ އަހަރުގެ ކޮންމެއިރަކު ވެސް ޒިޔާރަތްކުރެވޭނެ މަންޒިލެއްގެ ގޮތުގައި އިޝްތިހާރު ކުރުން ވެސް ހިމެނެއެވެ. އަދި ރާއްޖެއަކީ އެންމެ މަގްބޫލު ފަތުރުވެރިކަމުގެ މަންޒިލްގެގޮތުގައި ޕްރޮމޯޓުކޮށް، ރާއްޖޭގެ ފަތުރުވެރިކަމުގެ އަގުހުރި މައުލޫމާތުތައް މިހަރަކާތުގެ ތެރެއިން ފޯރުކޮށްދެވޭނެއެވެ.

އެމްއެމްޕީއާރުސީން މަސައްކަތްކުރައްވަމުން ގެންދަވަނީ ރާއްޖެއަށް ލިބިފައިވާ ވަތރލްޑްސް ލީޑިންގ ޑެސްޓިނޭޝަންގެ މަގާމު ދެމެހެއްޓުމަށެވެ.