ކުރީ ސަރުކާރުން ބައެއް މަޝްރޫއުތައް ކުންފުނިތަކާއި ހަވާލުކޮށްފައިވަނީ އެޑްވާންސް ޕޭމެންޓް ނުދައްކާ ކަމުގައި ކޮންސްޓްރަކްޝަން މިނިސްޓަރ ޑޮކްޓަރ ޢަބްދުﷲ މުއްޠަލިބް ވިދާޅުވެއްޖެއެވެ.

ރައީސުލްޖުމްހޫރިއްޔާގެ އޮފީހުގައި އޮކްޓޯބަރ 28 ވަނަ ދުވަހު ބޭއްވި ނޫސްވެރިންގެ ބައްދަލުވުމުގައި އެމަނިކުފާނު ވަނީ މި ޕްރޮޖެކްޓްތައް ހުއްޓިފައިވަނީ ބަޖެޓުގައި އެވަރަށް ފައިސާ ނެތުމުންކަން ފާހަގަކުރައްވާފައެވެ.

ކޮންސްޓްރަކްޝަން މިނިސްޓްރީގައި ސޮއިކޮށްފައިވާ ޕްރޮޖެކްޓްތަކުގެ އަގު 39 ބިލިއަން ރުފިޔާއަށް އަރާކަން ފާހަގަކުރައްވައި، އެއީ 322 މަޝްރޫއެއް ހިންގުމަށް ހިމަނާފައިވާ ބަޖެޓު ކަމަށް ވެސް މިނިސްޓަރު ވަނީ ފާހަގަކުރައްވާފައެވެ.

އެހެންނަމަވެސް މިހުރިހައި މަޝްރޫއެއް ހިންގުމަށް މިއަހަރުގެ ބަޖެޓުގައި ހިމަނާފައިވަނީ 3.6 ބިލިއަން ރުފިޔާ ކަމަށް މިނިސްޓަރު ވިދާޅުވިއެވެ. އަދި މިހާރު ހިންގުމަށް ހަމަޖެހިފައިވާ ޕްރޮޖެކްޓްތަކުގެ އަގު 39 ބިލިއަނަށް އަރާއިރު، މިއަހަރުގެ ބަޖެޓުގައި ހިމަނާފައި އޮތީ 3.6 ބިލިއަން ރުފިޔާކަމަށްވުމުން، މިއީ ބޭނުންވާ އަދަދުގެ ގާތްގަނޑަކަށް 20 އިންސައްތަ ކަމަށް ވިދާޅުވިއެވެ.

މިނިސްޓަރު ވަނީ މި ސަރުކާރު ހަވާލުވިފަހުން 37 މަޝްރޫއެއް ނިންމާފައިވާކަމަށް ވެސް ވިދާޅުވެފައެވެ.