ކޮމިޝަންތަކަށް ވަކިވަކި މެންބަރުން ވެސް އައްޔަންކުރުމުގެ ފުރުސަތު އޮންނަންވީ ރައީސުލްޖުމްހޫރިއްޔާއަށް ކަމަށް ފޭދޫ ދެކުނު ދާއިރާގެ މެންބަރު އިބްރާހިމް ދީދީ (އައިބީ) ވިދާޅުވެއްޖެއެއެވެ.

އެމަނިކުފާނު މިހެން ވިދާޅުވީ އެންޓި ކޮރަޕްޝަން ކޮމިޝަންގެ ގާނޫނަށް އިސްލާހު ހުށަހެޅުމުގެ ބިލަށް ވާހަކަ ދައްކަވަމުންނެވެ.

އެ އިސްލާހަކީ އެންޓި ކޮރަޕްޝަންގެ ރައީސްކަމަށް އައްޔަންކުރަން ބޭނުންވާ ބޭފުޅަކު ސީދާ ރައީސް ހިޔާރުކުރައްވާގޮތަށް އޮތް އިސްލާހެކެވެ.

އައިބީ ވިދާޅުވީ ރަށްރަށާއި އަތޮޅުތަކަށް އިންތިހާބު ކުރެވޭ މެންބަރުންނާއި ރައީސުންނަށްވުރެ ސީދާ ރައީސް ކަތީބުން އައްޔަންކުރި އިރު ކަންކަން މާ ރަނގަޅު ކަމަށެވެ.

އެހެންކަމުން ކޮމިޝަންތަކުގެ ރައީސުން ވެސް މެމްބަރުން ވެސް އައްޔަންކުރުމުގެ އިހްތިޔާރު އޮންނަންވީ ސީދާ ރައީސްގެ އަތްޕުޅުގައި ކަމުގައި ވަނީ ވިދާޅުވެފައެވެ.