ކޮމިޝަންތަކުގެ ރައީސާއި ނައިބު ރައިސް ކަނޑައެޅުމުގެ ބާރު ރައީސަށް ލިބިދިނުން މުހިންމު ކަމުގައި ރައްޔިތުންގެ މަޖިލީހުގެ ނައިބު ރައީސް އަހްމަދު ނާޒިމް ވިދާޅުވެއްޖެއެވެ.

އެމަނިކިފާނު މިހެން ވިދާޅުވީ އެންޓި ކޮރަޕްޝަންސްގެ ގާނޫނަށް ހުށައަޅާފައިވާ އިޞްލާހަށް ވާހަކަ ދައްކަވަމުންނެވެ.

އެ އިސްލާހަށް ތާއީދުކުރައްވާކަން ހާމަކުރައްވަމުން ނާޒިމް ވިދާޅުވީ ކުރީ ސަރުކާރުން ޖޭއެސްސީގެ ރައީސް އައްޔަންކުރުމަށް މިގޮތަށް ޢަމަލުކޮށްފައިވާކަމަށެވެ. އެގޮތުން ޖޭއެސްސީގެ ރައީސް އައްޔަންކުރުމުގެ ބާރު ރައީސުލްޖުމްހޫރިއްޔާ އަށް ދެއްވާފައިވާކަން ނާޒިމް ފާހަގަކުރެއްވިއެވެ.

މީގެއިތުރުން އެމްޑީޕީގެ ސަރުކާރުގައި އޭސީސީގެ ފަސް މެންބަރުން މަހގާމުން ވަކިކުރައްވައި، އައު މެންބަރުން އައްޔަންކުރެއްވިކަމަށާއި އޭސީސީން، އެ ކޮމިޝަންގެ ޒިންމާ އަދާކުރާކަން ރައްޔިތުން ގަބޫލު ނުކުރާކަމަށް ވެސް ވިދާޅުވިއެވެ.

އެހެންކަމުން އެ މައްސަލަތައް ބެލޭނެ ނިޒާމެއް ގާއިމްކުރުމަށް ސަރުކާރުން މަސައްކަތްކުރައްވާކަމަށް ނާޒިމް ވަނީ ވިދާޅުވެފައެވެ. އަދި ކޮމިޝަނުގެ ރައީސް އައްޔަންކުރުމުގެ ބާރަކީ ރައީސުލްޖުމްހޫރިއްޔާއަށް މުތުލަގަށް ލިބެންޖެހޭ ބާރެއް ކަމަށެވެ.

އެހެންކަމުން ކޮމިޝަންތަކުގެ ރައީސާއި ނައިބު ރައިސް ކަނޑައެޅުމުގެ ބާރު ރައީސަށް ލިބިދިނުން މުހިންމުކަން ފާހަގަކުރައްވާ ނާޒިމް ވިދާޅުވީ އެމްޑީޕީގެ ފަރާތުން ކޮމިޝަންތަކަށް އައްޔަންކުރައްވާފައި ތިއްބެވި ބޭފުޅުންނަކީ ޕްރޮފެޝަނަލް މީހުންކަމަށް ފެނިވަޑައި ނުގަންނަވާކަމަށެވެ.