ގުޅީފަޅުން ގޯތި ލިބުނު މީހުންނަށް ލިބޭ ބިން ކަނޑައެޅުމަށް ބާއްވާ ގުރުއަތުލުން ފަށައިފިއެވެ.

ދަރުބާރުގޭ ރަންނަބަނޑޭރި މާލަމުގައި ކުރިއަށްދާ މިގުރުއަތުގައި މިހައިތަނަށް ޕްލޮޓް ހަވާލުކޮށްފައިވާ ފަރާތްތަކާއި މިހައިތަނަށް ޕްލޮޓް ހަވާލުނުކޮށް ތިބި ފަރާތްތައް ވެސް ހިމެނެއެވެ. އަދި ގިރާވަރު ފަޅުން ލިބިފައިވާ ގޯތިތައް ގުޅީފަޅަށް ބަދަލުކުރި މީހުންގެ ގޯތީގެ ގުރުއަތުލުން ވެސް ހިމެނެއެވެ.

ހައުސިންގ މިނިސްޓްރީން ވިދާޅުވެފައިވަނީ "ގުޅީފަޅުގެ ލޭންޑް ޔޫސް ޕްލޭން" ގެ ދަށުން އައިސްފައިވާ ބަދަލާގުޅިގެން، ކުރިން ބިންވެރިޔާ ސްކީމުގެ ދަށުން ގުޅީފަޅުން ގޯތި ލިބިފައިވާ ފަރާތްތަކުގެ ގޯތީގެ ލޮކޭޝަނަށް ބަދަލު އައިސްފައިވާ ކަމަށެވެ.

ގުޅީފަޅުން ގޯތިލިބޭ ފަރާތްތަކުގެ ލިސްޓުގައި ވަނީ 1250 އަކަފޫޓުގެ 669 ގޯތި، 1650 އަކަފޫޓުގެ 1234 ގޯތި، 2050 އަކަފޫޓުގެ 916 ގޯއްޗެވެ. އަދި 2450 އަކަފޫޓުގެ 473 ގޯއްޗާއި 2850 އަކަފޫޓުގެ 158 ގޯއްޗާއި 3250 އަކަފޫޓުގެ 49 ގޯއްޗާއި 3650 އަކަފޫޓުގެ 21 ގޯއްޗެވެ.

ގުޅީފަޅުގެ ބިން ލިބޭ ފަރާތްތަކުގެ ގުރުނެގުމުގެ ކަންކަން ކުރިއަށް ގެންދަނީ އެ މިނިސްޓްރީން އެކުލަވާލާފައިވާ ލިސްޓުގައިވާ ތަރުތީބުން، އެކަމަށް ކަނޑައަޅާފައިވާ މިނިސްޓްރީގެ މުވައްޒަފުންނެވެ.

އެ މިނިސްޓްރީން ވިދާޅުވީ ގުޅީފަޅުން ބިން ލިބޭ ފަރާތްތަކުން ގުރުނެގުމަށް ހަމަޖެހިފައިވާ މާލަމަށް ވަދޭވޭނެ އިންތިޒާމު ހަމަޖެހިފައިވާ ކަމަށާއި ބިން ލިބޭ ފަރާތެއްގެ ބަދަލުގައި އެހެން ފަރާތަކުން ހާޟިރުވާން ބޭނުންނަމަ، ބިން ލިބޭ ފަރާތުގެ އިއުތިރާޟެއް ނެތް ކަމުގެ ލިޔުމަކާ އައި.ޑީ.ކާޑްގެ ކޮޕީ ގެންނަންވާނެ ކަަމަށެވެ.