ރައީސް ޑރ. މުޙައްމަދު މުޢިއްޒުގެ ކެބިނެޓަަށް އެންމެފަހުން އައްޔަންކުރެއްވި ތިން މިނިސްޓަރުންނަށް ރައްޔިތުންގެ މަޖިލީހުގެ ރުހުން ދެއްވައިފިއެވެ.

ކެބިނެޓަށް އެންމެފަހުން އައްޔަންކުރައްވާފައިވަނީ ފޮރިން މިނިސްޓަރުގެ މަގާމަށް އައްޔަންކުރެއްވި ޑރ. އަބްދުﷲ ޚަލީލާއި، ފިނޭންސް މިނިސްޓަރަކަށް އައްޔަންކުރެއްވި މޫސާ ޒަމީރު އަދި ހެލްތު މިނިސްޓަރު ކަމަށް އައްޔަން ކުރެއްވި އަބްދުﷲ ނާޒިމްއެވެ.

އެ ބޭފުޅުންނަށް ރުހުން ދެއްވާފައިވަނީ އޮކްޓޯބަރ 29 ވަނަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައެވެ.

ގާނޫނުގައިވާ ގޮތުގައި ރައީސުލްޖުމްހޫރިއްޔާ ވަޒީރުންގެ މަޖިލީހަށް ބަދަލެއް ގެންނެވި ނަމަވެސް އަދި ވަޒީރުންގެ މަޖިލީހަށް ބޭފުޅަކު އައްޔަން ކުރެއްވި ނަމަވެސް ރައްޔިތުންގެ މަޖިލީހުގެ ރުހުން ހޯދަން ޖެހޭނެއެވެ.

ފޮރިން މިނިސްޓަރުގެ މަގާމަށް އައްޔަންކުރައްވާފައިވާ ޑރ. ޚަލީލު ކުރިން ހުންނެވީ ހެލްތު މިނިސްޓްރީގައެވެ. އަދި މޫސާ ޒަމީރު ކުރިން ހުންނެވީ ފޮރިން މިނިސްޓްރީގައެވެ. ކުރީގެ ރައީސް ޔާމީންގެ ވެރިކަމުގައި ވެސް ހެލްތު މިނިސްޓަރުކަން ކުރައްވާފައިވާ އަބްދުﷲ ނާޒިމް ހުންނެވީ ރައީސުލްޖުމްހޫރިއްޔާގެ އޮފީހުގެ ޕަބްލިކް ޕޮލިސީ ސެކްރެޓަރީގެ މަގާމުގައެވެ.

ރައީސް، އެމަނިކުފާނުގެ ކެބިނެޓަށް ބަދަލު ގެންނެވީ މިދިޔަ ސެޕްޓެމްބަރ މަހުގެ 30 ވަނަ ދުވަހުއެވެ. އަދި ތިން މިނިސްޓަރުންނަށް ރުހުން ދިނުމުގެ މައްސަލަ ދިރާސާ ކުރުމަށް ކޮމިޓީއަށް ފޮނުއްވީ މި މަހު 14 ވަނަ ދުވަހުއެވެ.