ޑްރަގް ކެފޭގެ ގޮތުގައި ބޭނުންކުރަމުންދިޔަ 40 އަށްވުރެ ގިނަ ތަންތަން ބަންދުކޮށްފިއެވެ.

ދިވެހި ފުލުހުންގެ ހިދުމަތުން ނޮވެމްބަރ 14 ވަނަ ދުވަހު ބޭއްވި ނޫސްވެރިންގެ ބައްދަލުވުމުގައި ވަނީ ޑްރަގް ކެފޭ ހިންގާ ކަމަށް ފުލުހުންނަށް ތުހުމަތުކުރެވޭ ތަންތަނުގައި ޑިއުޓީ ކުރަމުންދާ ކަމަށް ވިދާޅުވެފައެވެ.

ކެފޭ އުސޫލުން މަސްތުވާތަކެތި ބޭނުން ކުރަމުންދާ ތަންތަން ބަންދުކުރަމުން ކަމަށާއި ފުލުހުންނަށް މިހާތަނަށް ރިޕޯޓުކޮށްފައިވާ ޑްރަގުގެ 683 މައްސަލައެއްގެ ތެރެއިން 345 މައްސަލައެއްގެ ތަހުގީގު ނިންމައި، ދައުވާކޮށްދިނުމަށް އެދި ޕްރޮސިކިއުޓަރ ޖެނެރަލް (ޕީޖީ) އޮފީހަށް ފޮނުވައިފައިވާ ކަމަށް ވެސް ވިދާޅުވިއެވެ.

ފުލުހުން އިތުރަށް ވިދާޅުވީ އޭގެ ތެރޭގައި ހިމެނޭ ޑްރަގް ޓްރެފިކިންގެ 19 މައްސަލައެއް ސާބިތުވާ ކަމަށް ކޯޓުން ހުކުމް ކޮށްފައިވާ ކަމަށެވެ.

މީގެއިތުރުން އެކި ހިސާބުތަކުގައި ފުލުހުން ހިންގި އެންޓި ޑްރަގްސް އޮޕަރޭޝަންތަކުގައި 183 ކިލޯއަށްވުރެ ގިނަ ޑްރަގްސް އާއި 8400 އަށްވުރެ ގިނަ ބަނގުރާ ފުޅި އަތުލައިގެންފައިވާ ކަމަށް ވެސް ވިދާޅުވިއެވެ.

އެއީ މަގުމަތީ އަގުން ބަލާނަމަ 385 މިލިއަން ރުފިޔާގެ މަސްތުވާތަކެތި ކަމަށް ވެސް ވަނީ ވިދާޅުވެފައެވެ.