ދަރުމަވަންތަ ހޮސްޕިޓަލުގެ ބޭނުން އެންމެ އެދެވޭގޮތުގައި ބޭނުންނުކޮށް ހުރުމަކީ ބޮޑު އިހުމާލެއް ކަމުގައި ހެލްތު މިނިސްޓަރ ޢަބްދުﷲ ނާޒިމް އިބްރާހިމް ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ދަރުމަވަންތަ ހޮސްޕިޓަލް ޓަރޝަރީ ފެންވަރުގައި ރަސްމީކޮށް ހުޅުވުމުގެ ރަސްމިއްޔާތުގައި ވާހަކަދައްކަވަމުންނެވެ.

"ދަރުމަވަންތަ ހޮސްޕިޓަލް 2018 ވަނަ އަހަރު ނިމުނަސް އެ ހޮސްޕިޓަލްގެ ބޭނުން އެންމެ އެދެވޭގޮތުގައި ބޭނުންނުކޮށް ހުރުމަކީ ބޮޑު އިހުމާލެއް." މިނިސްޓަރު ވިދާޅުވިއެވެ.

އެހެންނަމަވެސް ރާއްޖޭގެ ސިއްހީ ނިޒާމުގައި ހުރި އެތައް މައްސަލަތަލެއް ހައްލުކުރެއްވުމަށް ރައީސް ޑރ. މުޙައްމަދު މުޢިއްޒު ކުރައްވަމުން ގެންދަވާ މަސައްކަތްޕުޅު މިއަދު ފެނިގެންދާކަމަށް ވިދާޅުވިއެވެ.

އެގޮތުން ބަލިވީމަ ބޭސްފަރުވާގެ ނިޒާމް ހަރުދަނާކުރުމާއި އެކަންކަން ފުޅާކުރުމާއި ބަލިމަޑުކަމުން ދުރުހެލިވެ ތިބުމަށް ދުޅަހެޔޮ އާބާދީއެއް މި ގައުމުގައި ބިނާކުރުން ފާހަގަކުރެއްވިއެވެ. އަދި ސިއްހީ ދާއިރާގެ ގަވަނަންސް ހަރުދަނާކުރުމަށްޓަކައި ކުރައްވަންޖެހޭ އެތައް މަސައްކަތްތަކެއް މި 52 ހަފްތާގެ ތެރޭގައި ރައީސްގެ ސީދާ ބެލުމުގެ ދަށުން ފަށާފައިވާކަމަށް ވެސް ވިދާޅުވިއެވެ.

މިނިސްޓަރު އިތުރަށް ވިދާޅުވީ ރައީސް ޑރ. މުއިއްޒުގެ ސަރުކާރުން މަސައްކަތް ކުރައްވަމުން ގެންދަވަނީ ރައްޔިތުންގެ ކަންބޮޑުވުންތައް ބައްލަވައި، އެކަންކަން ހައްލުކޮށްދެއްވުމަށް ކަމަށެވެ. އެގޮތުން ދިވެހި ރައްޔިތުންނަށް ކުރިއަށްއޮތް 4 އަހަރު ސިއްހީ ދާއިރާއަށް ގެންނަ ތަރައްްގީއާއި ކުރިއެރުމުން ފެންނާނީ ރާއްޖޭގެ ސިއްހީ ނިޒާމުގައި މުޅިން އައު ބާބެއް ލިޔެވިގެންދާ މަންޒަރުކަން ވަނީ ފާހަގަކުރައްވާފައެވެ.

ހަމަމިއާއެކު ރާއްޖޭގެ ސިއްހީ ނިޒާމް ހަރުދަނާކުރުމުގެ މަސައްކަތުގެ ދަށުން މާލޭ ސަރަހައްދާއި އާބަން ސެންޓަރުތައް ހިމެނޭ ގޮތަށް މުޅި ރާއްޖޭގައި ފޯރުކޮށްދޭ ސިއްހީ ހިދުމަތް ހަރުދަނާވެގެންދާނެކަމަށް ވެސް ވިދާޅުވިއެވެ.