އއ. މަތިވެރީގެ ކަނބަލުންނަށް ޕޭސްޓްރީގެ ބާވަތްތައް ހަދައިގެން ވިޔަފާރި ކުރަން ދަސްކޮށްދޭ ކޯހެއް ބާއްވައިފިއެވެ.

މިއީ އުކުޅަސް ހޯޕް ޖަމިއްޔާ އާއި ޚިދުމަތް ޖަމްޢިއްޔާ އަދި ތުރުކީގެ އުއްމާ ޖަމްޢިއްޔާގެ އެހީތެރިކަމާއެކު ކުރިއަށް ގެންދިޔަ ކޯހެކެވެ.

މި ކޯސް ނިމި، ބައިވެރިންނަށް ސެޓްފިކެޓް ދިނުމުގެ ރަސްމިއްޔާތު ބާއްވާފައިވާއިރު، މި ކޯސް ކުރިއަށް ގެންދިޔައީ މި ނޮވެމްބަރ 8 ން 15 ވަނަ ދުވަހުގެނިޔަލަށެވެ. މި ކޯހުގައި 30 ކަނބަލުންނަށް ޕޭސްޓްރީގެ މަސައްކަތް ދަސްކޮށްދީ، ވިޔަފާރީގެ އުކުޅުތައް ދަސްކޮށްދިނުމުގެ ސެޝަންތައް ބޭއްވިއެވެ.

މަތިވެރި އާދަމް ޙުސައިން މާލަމުގައި ނޮވެމްބަރ 202415 ވަނަ ދުވަހުގެ ރޭ ބޭއްވި ނިންމުމުގެ ރަސްމިއްޔާތު ޝަރަފުވެރިކޮށްދެއްވީ މަތިވެރި ކައުންސިލްގެ ރައީސް އަޙްމަދު އަސްލަމްއެވެ. އަދި ބައިވެރިންނަށް ވަނީ ސެޓްފިކެޓް ދީފައެވެ.

މި ކޯހުގައި ކިޔަވައިދެއްވީ ކްރިއޭޓިވް ޕްރޮޑަކްޓްސްގެ މުދައްރިސް މަރްޔަމް ނަޝީދާއެވެ. އަދި ވިޔަފާރީގެ އުކުޅުތަކުގެ ކްލާސް ނަގައިދިނީ ދަ ވައިބް ޖަމްޢިއްޔާގެ މުދައްރިސް ޢާއިޝަތު ޙުޝްމަތު ޝާކިރުއެވެ.

ޖަލްސާގައި ކޯހުގެ ބައިވެރިންގެ ތެރެއިން ވާހަކަ ދެއްކެވި ޙައްވާ ޒައިބާ މުޙައްމަދު ވަނީ ކަނބަލުންނަށް ރަށުގައި ކުރިއަށް ގެންދެވުނު މި ކޯހުގައި ކިޔަވައިދެއްވި މުދައްރިސްގެ ހުނަރުވެރިކަމާއި ކެތްތެރިކަމާއި އެކުވެރިކަމާއެކު ހިނިތުންވެ ހުރެ ހުރިހާ ބައިވެރިންނަށް މަސައްކަތް ބުނެދިނުމުގައި ގެންގުޅުނު އޯގާތެރިކަމަށް ފާހަގަކޮށް ޝުކުރު ދަންނަވާފައެވެ. އަދި މިފަދަ މުހިންމު މަސައްކަތެއް ރަށަށް ގެނެސްދެއްވި ޖަމްޢިއްޔާތަކަށްވެސް ޝުކުރު ދެންނެވިއެވެ.

މިއީ ރާއްޖޭގައި އިޖްތިމާއީ ދާއިރާއިން ކަނބަލުން ބާރުވެރި ކުރުވުމުގެ އުފެއްދުންތަކުގެ ތެރެއިން ޕޭސްޓްރީގެ ތަފާތު ވައްތަރުތައް ހަދާނެ ގޮތް ދަސްކޮށްދިނުމަށްފަހު، އެކަނބަލުންނަށް ވިޔަފާރީގެ ދާއިރާއިން މާކެޓް ކުރަން ދަސްކޮށްދޭ ގޮތަށް ކުރިއަށް ގެންދިޔަ ކޯހެކެވެ.