ކުރިއަށް އޮތް 3 ދުވަހުވެސް މޫސުން ގޯސްވާނެކަމަށް މެޓް އޮފީހުން ލަފާކޮށްފިއެވެ.

މެޓް އޮފީހުން ބުނީ މިހާރުކުރަމުން މިދާ ވިއްސާރައަކީ ރާއްޖެ ސަރަހައްދުގައި ހުޅަނގު މޫސުން ނިމި، އިރުވައި މޫސުން ފެށޭދުވަސްވަރާއި ދިމާކޮށް މި ސަރަހައްދުގައި އުފެދިފައިވާ ލޯ ލެވެލް ސަރކިއުލޭޝަންއަކާއި ގުޅިގެން ކުރާ ވިއްސާރައެއް ކަމަށެވެ.

މި ވިއްސާރައިގާ ވޭތުވެދިޔަ 24 ގަޑިއިރު ރާއްޖޭގެ ބޮޑުބަޔަކަށް ވިއްސާރަކޮށް ބައެއް ރަށްތަކަށް ބޯކޮށް ވާރޭވެހިފައިވާކަމަށާއި އެގޮތުން އެންމެ ގިނައިން ވާރޭ ވެހުނުކަމަށް ރިކޯޑް ކުރެވިފައިވަނީ އައްޑޫ ސިޓީއަށް ކަމަށް އެ އޮފީހުން ބުނެއެވެ.

އެސިޓީގެ ހިތަދުއަށް 110 މިލިމީޓަރުގެ ވާރޭ ވެހިފައިވާ ކަމަށާއި ބޯކޮށް ވާރޭވެހޭނެކަމަށް ލަފާކުރެވޭތީ ހުރިހާ ފަރާތްތަކުން މޫސުމަށް ސަމާލުވުމަށް މެޓުން އޮފީހުން ވަނީ އިލްތިމާސްކޮށްފައެވެ.

މި އިލްތިމާސް ކޮށްފައިވާއިރު، ބ. އަތޮޅުން ފެށިގެން ވ. އަތޮޅާއި ހަމައަށް ރީނދޫ ސަމާލު އަދި ވ. އަތޮޅުން ފެށިގެން އައްޑޫ ސިޓީ އާ ހަމައަށް ވަނީ ހުދު ސަމާލު ވެސް ނެރެފައެވެ.

އެ އިދާރާ އިން ލަފާކޮށްފައިވާ ގޮތުގައި އެ ސަރަހައްދުތަކަށް ބޯކޮށް ވާރޭވެހި، ގުގުރުން އެކަށީގެން ވެއެވެ. އަދި ވިލާގަނޑުގައި ގަޑިއަކު 45 މޭލަށް ވައިގަދުވުން ވެސް އެކަށީގެންވާކަމަށް ވަނީ ލަފާކޮށްފައެވެ.

މީގެއިތުރުން މުޅި ރާއްޖެއަށް ވެސް 5 މޭލާއި 15 މޭލާ ދެމެދުގެ ބާރުމިނުގައި ވައިޖެހޭނެކަމަށާއި ވިލާގަނޑުގައި ގަޑިއަކު 35 މޭލަށް ވައި ގަދަވާނެ ކަމަށް ވެސް ވަނީ ލަފާކޮށްފައެވެ.