ބޭންކް އޮފް މޯލްޑިވްސް (ބީއެމްއެލް) ގެ ފުލީ ފަންޑެޑް ސްކޮލަރޝިޕް ލިބޭ ދަރިވަރުން ހޮވައިފިއެވެ.

އެ ބޭންކުން އެކްސްގައި ކޮށްފައިވާ ޕޯސްޓެއްގައި ބުނީ އެ ބޭންކުގެ 2024 ވަނަ އަހަރުގެ ސްކޮލަރޝިޕްގެ ދަށުން ރާއްޖޭގެ ބޭންކިންގ އަދި މާލީ ދާއިރާ ހަރުދަނާ ކުރުމަށް މި އަހަރު ތިން ދަރިވަރަކަށް ފުލީ ފަންޑެޑް ސްކޮލަރޝިޕް ދިން ކަމަށެވެ.

ބީއެމްއެލްގެ ސްކޮލަރޝިޕް ލިބުނު ދަރިވަރުންނަކީ ރީޝަމް މުހައްމަދު، ނޫރްހާން މުހައްމަދު މޫސާ އަދި އާއިޝަތު ސަރާ ނަސީރު އެވެ.

މި ސްކޮލަރޝިޕްގެ ދަށުން ދުނިޔޭގެ އެންމެ މަތީ 200 ޔުނިވަރސިޓީއަކުން ބޭންކިންގ އެންޑް ފައިނޭންސް ދާއިރާއިން ބޭނުންވާ ކޮންމެ އަންޑަރ ގްރެޖުއޭޓް ޕްރޮގްރާމެއް ފުރިހަމަ ކުރުމަށް ހުރިހައި ހަރަދެއް ބީއެމްއެކް އިން ދޭނެއެވެ.

ބީއެމްއެލްގެ ސީއީއޯ އަދި އެމްޑީ މުހައްމަދު ޝަރީފް ވަނީ މި ދަރިވަރުންނަށް މަރުހަބާ ވިދާޅުވެ މި ގައުމުގެ ބޭންކިން ނިޒާމް ހަރުދަނާ ކުރުމަށް ބީއެމްއެލް އިން ގިނަ މަސައްކަތްތަކެއް ކުރައްވާފައިވާކަން ފާހަގަކުރައްވާފައެވެ.

މިއީ 2022 ވަނަ އަހަރު ބީއެމްއެލް އިން ތައާރަފްކޮށްފައިވާ ސްކޮލަރޝިޕެކެވެ. މިހައިތަނަށް 6 ދަރިވަރަކަށް މި ސޮކޕލަރޝިޕް ދީފައިވާއިރު، މި ދަރިވަރުން ދަނީ އިނގިރޭސިވިލާތާއި އޮސްޓްރޭލިއާގެ އެންމެ މަތީ ފަންތީގެ ޔުނިވަރސިޓީތަކުން ތައުލީމު ހާސިލުކުރަމުންނެވެ.