ފާއިތުވެދިޔަ އެއް އަހަރު ދުވަހުގެ ތެރޭގައި ރާއްޖޭގެ އެކި އަތޮޅުތަކުގައި މަތީ ތައުލީމު ފުޅާކުރުމަށް އެތައް މަސައްކަތްތަކެއް ކުރެވިފައިވާކަމަށް ހަޔަރ އެޑިއުކޭޝަންގެ ސްޓޭޓް މިނިސްޓަރ، އަޙްމަދު ޝަފީޢު ވިދާޅުވެއްޖެއެވެ.

ސްޓޭޓް މިނިސްޓަރ މިހެން ވިދާޅުވެފައިވަނީ ޕީއެސްއެމްގެ "ރާއްޖެ މިއަދު " ޕްރޮގްރާމްގައި ކުރެވުނު ސުވާލަށް ޖަވާބު ދެއްވައި ދެއްކެވި ވާހަކައިގައެވެ.

ޝަފީޢު ވަނީ ރަށްރަށުގައި ގާއިމްކުރެވިފައިވާ ދިވެހިރާއްޖޭގެ ގައުމީ ޔުނިވަރސިޓީ (އެމްއެންޔޫ) އާއި ދިވެހިރާއްޖޭގެ އިސްލާމިކް ޔުނިވަރސިޓީ (އައިޔޫއެމް) ގެ ކެމްޕަސްތަކުގައި އައު ކޯސްތަށް ފަށާފައިވާކަން ފާހަގަކުރައްވާފައެވެ. އަދި މާލެއަށް ދަތުރުނުކޮށް، ރަށުގައި ތިބެ މަތީ ތައުލީމު ހާސިލުކުރުމުގެ ފުރުސަތު އިތުރުވެފައިވާކަމަށް ވެސް ވިދާޅުވިއެވެ.

މީގެއިތުރުން ރާއްޖޭއަށް މުހިންމު އެކި ދާއިރާތަކުން ޒުވާނުން ތަމްރީނުކުރުމުގެ އެކި މަސައްކަތްތައް ފަށާފައިވާކަން ވެސް ފާހަގަކުރެއްވިއެވެ.

އެގޮތުން ފަތުރުވެރިކަމުގެ ދާއިރާގައި މަސައްކަތްކުރާ ދިވެހިހިންގެ އަދަދު އިތުރުކުރުމަށް ތަމްރީނު ޕްރޮގްރާމްތައް ހިންގުމުގެ މަސައްކަތްތައް ކުރިއަށްގެންދާ ކަމަށް ވިދާޅުވިއެވެ. އަދި މަސްވެރިކަން އަދި ދަނޑުވެރިކަމުގެ ދާއިރާ އިން ޒުވާނުން ތަމްރީނުކުރުމުގެ މަސައްކަތްތައް ވެސް ކުރިއަށްދާކަން ވަނީ ފާހަގަކުރައްވާފައެވެ.