ރާއްޖެއަކީ ރައްކާތެރި މަންޒިލެއްގެ ގޮތުގައި ދެމެހެއްޓުމަށް ސަރުކާރުން އަބަދުވެސް މަސައްކަތްކުރައްވާނެ ކަމުގައި ޕީޕަލްސް ނެޝަނަލް ކޮންގްރެސް (ޕީއެންސީ) އިން ބުނެފިއެވެ.

އެޕާޓީން ޑިސެމްބަރ 23 ވަނަ ދުވަހުގެ ރޭ ބޭއްވި ހަރުގެ ޖަލްސާގައި ޓޫރިޒަމް މިނިސްޓްރީގެ ސްޓޭޓް މިނިސްޓަރ މުޙައްމަދު ނިހާދު ދެއްކެވި ވާހަކައާއި ގުޅިގެން ނެރުނު ނޫސްބަޔާނުގައެވެ.

އެ ބަޔާނުގައި ބުނީ ފަތުރުވެރިންނަށް ރާއްޖެއަކީ ރައްކާތެރި މަންޒިލެއްގެ ގޮތުގައި ދެމެހެއްޓުމަށް ސަރުކާރުން އަބަދު ވެސް މަސައްކަތްކުރަމުންދާނެކަން ޔަގީން ކުރާކަމަށެވެ. އަދި އެ ސިނާއަތުގައި އިންވެސްޓްކޮށްފައިވާ ފަރާތްތަކުގެ އިންވެސްޓުތައް ރައްކާތެރިކޮށްދިނުމުގައި ދިވެހި ދައުލަތުން އަދާކުރަންޖެހޭ ޒިންމާ އެންމެ ފުރިހަމައަށް އަދާކުރާނެކަމުގެ އިތުބާރު އެބައޮތްކަމަށް ވެސް ވަނީ ބުނެފައެވެ.

މީގެއިތުރުން ފަތުރުވެރިންނަށް ރައްކާތެރި މަންޒިލެއްގެގޮތުގައި ރާއްޖެ ދެމެހެއްޓުމަށް ސަރުކާރުން އަބަދުވެސް މަސައްކަތްކުރާނެކަމަށް ވެސް ވަނީ ބުނެފައެވެ. އަދި ރާއްޖޭގައި ރަޖިސްޓްރީކޮށްގެން ހިންގާ ސިޔާސީ ޕާޓީއަކުން، މަދަނީ ޖަމިއްޔާއަކުން ރާއްޖޭގެ ފަތުރުވެރިކަމަށް އަދި ދިވެހި އިތްތިސާދަށް ފޫނުބެއްދޭވަރުގެ ގެއްލުމެއް ލިބިދާނެ ނުރައްކާތެރި ޢަމަލެއް ނުހިންގާނެކަމަށް ޕީއެންސީން ގަބޫލުކުރާ ކަމަށް ވެސް އެ ބަޔާނުގައި ވެއެވެ.

ޕިއެންސީގެ ބަޔާނުގައި އިތުރަށް ބުނީ ޕާޓީތަކާއި މަދަނީ ޖަމިއްޔާތައް ހަރަކާތްތެރިވާނީ ގާނޫނު ހުއްދަކުރާ އިމުގެ ތެރޭގައި ކަމަށާއި އެ އިމުން ބޭރުވާނަމަ އެކަމާމެދު އަޅަންޖެހޭ ފިޔަވަޅުތައް ދައުލަތުގެ ކަމާބެހޭ އިދާރާތަކުން އަޅާނެކަމަމެދު ޝައްކުނުކުރާ ކަމަށެވެ.

ހަމަމިއާއެކު ކުރިއަށް އޮތް ތަނުގައިވެސް ދައުލަތުގެ މުއައްސަސާތަކާއި ސިޔާސީ ޕާޓީތަކާއި މަދަނީ ޖަމިއްޔާ ޖަމާއަތްތަކާއި ވަކިވަކި ފަރުދުން ވެސް ފަތުރުވެރިކަމަށާއި ބައިނަލްއަގްވާމީ ދުނިޔޭގައި ރާއްޖޭގެ ޝުހުރަތަށް އުނިކަން އަތުވެދާނެ އެއްވެސްކަމެއް ނުކުރުމަށް ޕީއެންސީން ވަނީ އިލްތިމާސްކޮށްފައެވެ.