ރައީސް ޑރ. މުޙައްމަދު މުޢިއްޒު، ތުރުކީގެ ރައީސް ރަޖަބް ޠައްޔިބު އުރްދުޣާނަށް ތަޢުޒިޔާގެ މެސެޖެއް ފޮނުއްވައިފިއެވެ.

މިއީ އެގައުމުގެ ފެކްޓްރީއެއްގައި އެއްޗެއް ގޮވައި ބަޔަކު މަރުވުމާ ގުޅިގެން ފޮނުއްވި ތައުޒިޔާގެ މެސެޖެކެވެ.

އެ މެސެޖުގައި ތުރުކީގެ ބްލިކެސިރް ސަރަހައްދުގައި ހުރި ހަނގުރާމައިގެ އާލާތްތައް އުފައްދާ ފެކްޓްރީއެއްގައި އެއްޗެއް ގޮވައި، 12 މީހުން މަރުވެ، ގިނަ ބަޔަކު ޒަޚަމްވި ހާދިސާ ޚަބަރު އަޑުއެއްސެވީ ފުން ހިތާމައާއެކުކަމަށް ވަނީ ވިދާޅުވެފައެވެ.

މީގެއިތުރުން އެގައުމުގެ ރައީސަށާއި އެ ގައުމުގެ ރައްޔިތުންނާއި އެ ހާދިސާގައި މަރުވި މީހުންނާއި ޒަޚަމްވި މީހުންގެ އާއިލާތަކަށް ތައުޒިޔާ ރައްދުކޮށްދެއްވުމަށް އެދިވަޑައިގެންފައި ވެއެވެ. އަދި މެސެޖު ނިންމަވާލައްވަމުން ދިވެހި ސަރުކާރާއި ދިވެހި ރައްޔިތުންގެ ފަރާތުން ހާދިސާގައި ޒަޚަމްވި އެންމެންނަށް އަވަސް ޝިފާއަކަށް ވަނީ އެދިވަޑައިގެންފައެވެ.

ބްލިކެސިރް ސަރަހައްދުގައި ހުރި ހަނގުރާމައިގެ އާލާތްތައް އުފައްދާ ފެކްޓްރީއެއްގައި އެއްޗެއް ގޮވައި މި ހާދިސާ ހިނގާފައިވަނީ މިއަދުގެ ވަގުތެއްގައެވެ.