އޮކްޓޯބަރ މަހު ޒަކާތުފަންޑުން ބޭސްފަރުވާ އަށް 5 ލައްކައަށްވުރެ ގިނަ ރުފިޔާ ހަރަދުކޮށްފައިވާކަމަށް ތަފާސް ހިސާބުން ދައްކައިފިއެވެ.

ދިވެހިރާއްޖޭގެ ޒަކާތު ހައުސް ގެ ތަފާސްހިސާބުތަކުން ދައްކާގޮތުގައި ކެންސަރު ބައްޔަށާއި ހިތުގެ އޮޕަރޭޝަން ކުރުމަށާއި ކިޑްނީ ބަލިތަކަށާއި ސިކުނޑީގެ އޮޕަރޭޝަންތަކާއި ޓްރާންސްޕްލާންޓް ހެދުމަށް އެ ފަންޑުން ވަނީ އެހީފޯރުކޮށްދީފައެވެ. އަދި އެހެނިހެން ބޭނުންތަކަށް ވެސް އެހީ ދީފައިވާކަަމަށް ދައްކައެވެ.

ތަފާސްހިސާބުން ދައްކާގޮތުގައި ކެންސަރަށް ފަރުވާކުރުމަށް 348،037 ރުފިޔާ، ކިޑްނީ ބަލިތަކަށް 80،569 ރުފިޔާ، ސިކުނޑީގެ އޮޕަރޭޝަންތަކަށް 33،924 ރުފިޔާ ވަނީ ހަރަދުކޮށްފައެވެ. އަދި ހިތުގެ އޮޕަރޭޝަންކުރުމަށް 33،924 ރުފިޔާއާއި ޓްރާންސްޕްލާންޓް ހެދުމަށް 25،443 ރުފިޔާއާއި އެހެނިހެން ބަލިތަކަށް 470،696 ރުފިޔާ ވަނީ ހަރަދުކޮށްފައެވެ.

މީގެއިތުރުން ޒަކާތު ފަންޑުން ޖުމްލަ 529،702 ރުފިޔާ ހަރަދުކޮށްފައިވާއިރު، އޮކްޓޯބަރ މަހުގެތެރޭގައި އެހީގެގޮތުގައި ދިނުމަށް ނިންމާފައިވަނީ ޖުމްލަ 992،594 ރުފިޔާއެވެ.

ޒަކާތު ފަންޑުން ކުރި އެހެނިހެން ޚަރަދުތަކުގެތެރޭގައި ހިމެނެނީ ޒަކާތުގެ މަސައްކަތްކުރުމަށް ޒަކާތު ފަންޑުން މުސާރަ ދޭގޮތަށް މުވައްޒަފުންނަށް އުޖޫރަދިނުމަށް ޢާމިލުންގެ ބައިން ކޮށްފައިވާ ހަރަދެވެ. އެގޮތުން އިދާރީ މުވައްޒަފުންގެ އުޖޫރައިގެގޮތުގައި 252،722.24 ރުފިޔާ ވަނީ ހޭދަކޮށްފައެވެ. އަދި ރާއްޖޭން ބޭރަށް ކުރާ ދަތުރުތަކަށް 92،363 ރުފިޔާ ކަނޑައަޅާފައިވެއެވެ.

ތަފާސްހިސާބުން ދައްކާ ގޮތުގައި އޮކްޓޫބަރު މަހު 124 މީހަކަށް ޒަކާތު ފަންޑުން ވަނީ އެހީތެރިކަން ފޯރުކޮށްދީފައެވެ.