ރާއްޖެއަށް މިހާރު ކުރަމުންދާ ވިއްސާރައިގައި ޅ. ކުރެންދޫ އަށް ބިޑެތި ގެއްލުންތަކެއް ލިބެމުން އަންނަކަމަށް އެރަށު ކައުންސިލުން ހާމަކޮށްފިއެވެ.

އެރަށު ކައުންސިލުން ވިދާޅުވީ މެދުކެނޑުމެއްނެތި ގާތްގަޑަކަށް ދެގަޑިއިރު ބޯކޮށް ވާރޭ ވެހުމުގެ ސަބަބުން އެރަށުގެ ވަރަށްގިނަ ގެތަކަށް ފެންވަދެފައިވާ ކަމަށެވެ.

"ގާތްގަޑަކަށް ބުނާނަމަ ރަށުގެ ތިންބައިކުޅަ ދެބައި ގެތަކަށް ވަނީ ފެންވަދެފަ. މީގެތެރެއިން 70 ވަރަކަށް ގެއަށް ވަރަށްބޮޑަށް ގެއްލުން ލިބިފަހުރީ." ކައުންސިލުން ވިދާޅުވިއެވެ.

ކައުންސިލުން އިތުރަށް ވިދާޅުވީ ބައެއް ގޭގައި ހިފާގެންގުޅޭ ސާމާނަށް ބޮޑެތި ގެއްލުންވެފައިވާއިރު، ބައެއް ފަރުނީޗަރުތައް ވެސް އަލުން ބޭނުން ނުކުރެވޭވަރަށް ހަލާކުވެފައިވާ ކަމަށެވެ.

ނެޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ރަށުގެ ހާލަތު ސާފުކުރަމުން އަންނައިރު، ކައުންސިލުން ދަނީ ގޭގެއަށާއި ތަކެއްޗަށް ލިބުނު ގެއްލުމުގެ ކަންކަން ސާފުކުރަމުންނެވެ.

އެގޮތުން ވަގުތީ ބޯހިޔާވަހިކަން ބޭނުންވެއްޖެނަމަ، އެ އެހީތެރިކަން ދިނުމަށް ރަށުގެ ސްކޫލްގައި ވަގުތީ ހިޔާއެއް ހަދާފައިވާ ކަމަށާއި ކެއިންބުއިމުގެ ކަންކަން ހަމަޖެއްސުމަށް ވެސް ކައުންސިލުން އެހީތެރިކަން ފޯރުކޮށްދެމުން އަންނަކަމަށް ވިދާޅުވިއެވެ.

ރާއްޖެއަށް މިހާރުކުރަމުން މިދާ ވިއްސާރައިގާ ދ. ބަނޑިދޫ އާއި އައްޑޫ ސިޓީ ފޭދޫގެ ގެއަކަށް ވެސް ވަނީ ގެއްލުންވެފައެވެ. އަދި މާލޭގެ މަގުތަކުގައި ފެން ބޮޑުވެ، ފެން ހިންދުމުގައި އެމްއެންޑީއެފް އިން ވަނީ ހަރަކާތްތެރިވެފައެވެ.