"ދިވެހިރާއްޖޭގެ ބައިއެނިއަލް ޓްރާންޒްޕޭރެންސީ ރިޕޯޓް (ބީ.ޓީ.އާރް)" ތައްޔާރު ކުރުމުގެ ތަޖުރިބާ ހިއްސާ ކުރުމަށް ސައިޑް އިވެންޓެއް ބާއްވައިފިއެވެ.

އެންވަޔަރްމެންޓް މިނިސްޓްރީން އިންތިޒާމުކޮށްގެން މި އިވެންޓު ބާއްވާފައިވަނީ އަޒަރބައިޖާންގެ ބާކޫގައި ކުރިއަށްދާ 29 ވަނަ ކޮންފަރެންސް އޮފް ދަ ޕާޓީސް ޓު ދަ ޔުނައިޓެޑް ނޭޝަންސް ފްރޭމްވަރކް ކޮންވެންޝަން އޮން ކްލައިމެޓް ޗޭންޖް (ކޮޕް29) ގެ ހަވާސާގައެވެ.

ހޯމަ ދުވަހު އަޒަރބައިޖާންގެ ބާކޫގައި ބޭއްވި މި އިވެންޓުގައި ރާއްޖޭގެ ބައިއެނިއަލް ޓްރާންޒްޕޭރެންސީ ރިޕޯޓް ތައްޔާރު ކުރުމުގައި ހަރަކާތްތެރިވީ ބައެއް ފަރާތްތަކުގެ ޓެކްނިކަލް ޕްރެޒެންޓޭޝަންތަކެއް ވަނީ ހުށައަޅާފައެވެ.

މިގޮތުން މި ޕްރެޒެންޓޭޝަންތަކުގައި ވަނީ މި ރިޕޯޓް އެކުލަވާލުމަށް މަޢުލޫމާތު ހޯދުމަށް ކޮށްފައިވާ މަސައްކަތްތަކާއި، ރިޕޯޓް އެކުލަވާލެވަފައިވާގޮތާއި ދިމާވި ގޮންޖެހުންތަކުގެ މައްޗަށް އަލި އަޅުވާލާފައެވެ.

އެއަށްފަހު ކުރިއަށް ދިޔައީ އެ މިނިސްޓްރީ މޮޑަރޭޓް ކުރި ސުވާލާއި ޖަވާބުގެ ސެޝަނެކެވެ.