މި ސަރުކާރުން، ދައުލަތުގެ ބަޖެޓުން ބޮޑު ޖަރީމާއެއް ހިންގާފައިވާކަމުގެ ތުހުމަތު ދަ ޑިމޮކްރެޓްސްގެ ނައިބު ރައީސް މުހައްމަދު ޝިފާޒް (ޝިއްޕެ) ކުރައްވައިފިއެވެ.

ދަ ޑިމޮކްރެޓްސްއިން ބޭއްވި ބަހުސެއްގައި ވާހަކަ ދައްކަވަމުން ޝިފާޒް ވަނީ މި ސަރުކާރާ މެދު އިންތިހާއަށް ހިތްހަމަ ނުޖެހުން އެބަ އޮތްކަމަށެވެ. އަދި އެންމެ ބޮޑު ހިތްހަމަ ނުޖެހުމަކީ ވެރިކަމަށް އައި އިރުގައި ގާތްގަނޑަކަށް 49 ބިލިއަނުގެ ބަޖެޓެއް އޮތްއިރު، އަހަރު ނިމެން ތިން މަހަށް ކައިރިވީތަނާ ފަސް މިލިއަން ރުފިޔާގެ ސަޕްލިމެންޓްރީ ބަޖެޓެއް ހުށަހަޅަން ޖެހުންކަން ފާހަގަކުރެއްވިއެވެ.

"ރައްޔިތުން ސުވާލު މިކުރީ ކޮބައިތޯ އެ ފައިސާ، ފާސްކުރި ބަޖެޓަށް ވީ ގޮތެއް ސާފުކޮށެއް ނުދެވުނު،" ޝިފާޒް ވިދާޅުވިއެވެ.

މީގެއިތުރުން ދައުލަތުގެ ބަޖެޓުން ބޮޑު ޖަރީމާއެއް ހިންގާފައި ވާކަމަށް މި ސަރުކާރަށް ތުހުމަތު ކުރައްވައި، ވިދާޅުވީ ސަރުކާރު ޖަވާބުދާރީ ކުރުވަން މަގުމައްޗަށް ނުކުންނަން ވެސް ތައްޔާރަށް ހުންނެވި ކަމަށެވެ.

ޝިފާޒު ވަނީ މި ސަރުކާރުން ޚަރަދުތަކުގެ ތަފުސީލު ހާމަކުރައްވާނެ ކަމަށް ގަބޫލުނުކުރައްވާކަމަށް ވެސް ވިދާޅުވެފައެވެ.

"ޑރ. މުއިއްޒަށް މި ދަންނަވަނީ ތިން ހަފުތާވަންދެން ފިނޭންސް މިނިސްޓްރީ ބަންދުނުކޮށް މުވައްޒަފުން ބައިތިއްބައިގެން ކޮން ބިލުތަކެއްތޯ މަޖިލީހަށް ހުށަހަޅަން ފޯޖުކޮށްގެން ހައްދަވަން މަސައްކަތް ކުރީ." އިތުރަށް ވިދާޅުވިއެވެ.

ހަމަމިއާއެކު ބަޖެޓުން ރަށްރަށުގައި އެއްވެސް މަޝްރޫއެއް ކުރިއަށް ނުގެންދާ ކަމަށާއި މަސްވެރިންނަށް ފައިސާ ނުދޭކަމަށް ތުހުމަތު ކުރައްވައި، ވިދާޅުވީ ޕްރައިވެޓް ސެކްޓަރ ވިޔަފާރިތައް ވެސް މިހާރު ނެތް ކަމަށެވެ.