ސަރުކާރުން އަންނައަހަރަށް ލަފާކުރައްވައި، ހުށަހެޅުއްވި ދައުލަތުގެ ބަޖެޓު ބަހުސްގެ މަރުހަލާ މިއަދު ނިންމާލައްވާނެކަމަށް ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ ވިދާޅުވެއްޖެއެވެ.

މަޖިލީހުގެ މިއަދުގެ ޖަލްސާ ފަށްޓަވައި މަޖިލީހުގެ ރައީސް ވިދާޅުވީ ބަޖެޓަށް ބަހުސްކުރުމަށް އެދިވަޑައިގެންފާއިވާ ހުރިހާ މެންބަރުންނަށް މިއަދު ފުރުސަތުދީ ބަހުސް މަރުހަލާ ނިންމާލައްވާނެކަމަށެވެ. އެހެންކަމުން މިއަދު ހެނދުނު 09:30 އާއި ހަމައަށް ބަޖެޓަށް ބަހުސްކުރުމަށް އެދިވަޑައިގަތުމުގެ ފުރުސަތު ވަނީ ދެއްވާފައެވެ.

އަންނަ އަހަރަށް 56.6 ބިލިޔަން ރުފިޔާގެ ބަޖެޓު މަޖިލީހަށް ހުށައެޅުއްވީ މިދިޔަ އޮކްޓޯބަރ މަހުގެ 31 ވަނަ ދުވަހުއެވެ. މި ބަޖެޓުގައި ހަރަދުގެ ގޮތުގައި ހިނގާނީ 49.2 ބިލިޔަން ރުފިޔާ ކަމަށް ލަފާކުރައްވާފައިވާއިރު، އޭގެތެރޭގައި ހިމެނެނީ ރިކަރަންޓް ޚަރަދުގެ ގޮތުގައި 35.9 ބިލިޔަން ރުފިޔާއާއި ކެޕިޓަލް ޚަރަދުގެ ގޮތުގައި 13.3 ބިލިޔަން ރުފިޔާއެވެ.

އަންނަ އަހަރުގެ ބަޖެޓުގައި ޕަބްލިކް ސެކްޓަރ އިންވެސްޓްމަންޓު ޕްރޮގްރާމަށް 12.4 ބިލިޔަން ރުފިޔާ ހިނގާނެކަމަށް ލަފާކުރައްވާފައިވާއިރު، ޖުމްލަ އާމްދަނީ އާއި ހިލޭ އެހީގެ ގޮތުގައި 39.7 ބިލިޔަން ރުފިޔާ ދައުލަތަށް ލިބޭނެކަމަށް ވަނީ ލަފާކުރައްވާފައެވެ.

މީގެއިތުރުން ހަރަދު ކުޑަކުރަން އަޅާ ފިޔަވަޅުތަކުން 6.6 ބިލިޔަން ރުފިޔާ ކުޑަކުރެވޭނެ ކަމަށް ވަނީ ލަފާކޮށްފައެވެ. 2025 ވަނަ އަހަރު ބަޖެޓުގައި އަހަރުގެތެރޭގައި ރިފޯމުތައް ތަންފީޒުކުރަން ހިމަނާފައިވެއެވެ.