އަންނަ އަހަރަށް ލަފާކޮށް ހުށަހެޅި ބަޖެޓުގައި އެއްވެސް މައުލޫމާތެއް ނެތް ކަމަށާއި ބަޖެޓު އަނބުރާ ގެންދިއުމަށް ރައްޔިތުންގެ މަޖިލީހުގެ މީދޫ ދާއިރާގެ މެންބަރު އަދި އެމްޑީއޭގެ ލީޑަރު އަހްމަދު ސިޔާމް މުހައްމަދު ގޮވާލައްވައިފިއެވެ.

އެމަނިކުފާނު މިފަދައިން ގޮވައިލެއްވީ ރައްޔިތުންގެ މަޖިލީހުގެ މިއަދުގެ ޖަލްސާގައި ބަޖެޓަށް ބަހުސްކުރައްވަމުންނެވެ.

"ބަޖެޓެއް ހުށަހަޅާއިރު ބަޖެޓުގެ ތަފްސީލު އެނގުން މުހިންމު. ރަށްރަށަށް ގެންނަން ޖެހޭ ތަރައްގީ ގެނައުމާއި އެކަމަށްޓަކައި ކުރަން ޖެހޭ ހޭދައިގެ ތަފްސީލު ރައްޔިތުންނަށް ކޮންމެހެން އެނގެން ޖެހޭ." ސިޔާމް ވިދާޅުވިއެވެ.

އެހެންނަމަވެސް ސަރުކާރުން އަންނަ އަހަރަށް ލަފާކޮށް ހުށަހެޅި ބަޖެޓުގައި އެފަދަ އެއްވެސް މައުލޫމާތެއް ނެތްކަން ފާހަގަކުރައްވައި، ސިޔާމް ވަނީ ކަންތައްތައް އެނގެން ރައްޔިތުން ބޭނުންވާކަމަށާއި މާދަމާ ވާނީ ކިހިނެއްކަން ވެސް އެނގެން ބޭނުންވާ ކަމަށް ވިދާޅުވެފައެވެ.

ސިޔާމް ސިފަކުރައްވާފައިވާ ގޮތުގައި މި ބަޖެޓަކީ ވިޔަފާރީގެ ވިސްނުމާ ދުރު، ޑިމޮކްރެސީ އާއި ޓްރާންސްޕޭރަންސީ އާ ދުރު ވިސްނުމެއްގައި ހުށަހަޅާފައިވާ ބަޖެޓެކެވެ. އަދި ބަޖެޓުގެ ތަފްސީލު ހިމެނޭ ފޮތް އިސްލާހުކުރުމަށް ފަހު، އަލުން ރައްޔިތުންގެ މަޖިލީހަށް ހުށަހެޅުމަށް ގޮވައިލެއްވިއެވެ.

ބަޖެޓުގެ ތަފްސީލު އިސްލާހުނުކުރަނީސް ބަޖެޓު ފާސްކުރުމަށް ވޯޓު ނުދެއްވާނެ ކަމަށް ވެސް ސިޔާމް ވިދާޅުވިއެވެ.