މޯލްޑިވްސް މީޑިއާ ކައުންސިލާއި ބްރޯޑްކާސްޓިންގ ކޮމިޝަން އެއްކަޮށްލައި، މީޑިއާ އެންޑް ބްރޯޑްކާސްޓިންގ ކޮމިޝަން އުފެއްދުމަށް ރައްޔިތުންގެ މަޖިލީހަށް ހުށަހެޅި ބިލު އަނބުރާ ގެންދިއުމަށް ހުށަހަޅައިފިއެވެ.

ރައްޔިތުންގެ މަޖިލީހުގެ ތުޅާދޫ ދާއިރާގެ މެމްބަރު އަބްދުލްހަންނާނު އަބޫބަކުރު ހުށަހެޅުއްވި މި ބިލު، އަނބުރާ ގެންދަން ހުށަހަޅުއްވާފައިވާކަން ރައޔިތުންގެ މަޖިލީހުގެ އިދާރާ އިން 'އޮއިވަރު' އަށް ވަނީ ކަށަވަރުކޮށްދެއްވާފައެވެ.

އަމިއްލަގޮތުން މަޖިލީހަށް އިންތިހާބުވެވަޑައިގެންނެވި މެންބަރު އަބްދުލްހަންނާން ހުށަހެޅުއްވި ބިލުގައިވާ ގޮތުން، މޯލްޑިވސް މީޑިއާ ކައުންސިލާއި ބްރޯޑްކާސްޓިންގ ކޮމިޝަންގެ ބަދަލުގައި މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަން އުފައްދަނީ ހަތް މެންބަރުންގެ މައްޗަށެވެ. އެއީ ރައީސް ހުށަހަޅުއްވާ، ރައްޔިތުންގެ މަޖިލީހުގެ ރުހުން ލިބޭ ހަތަރު މެންބަރުންނާއި މީޑިއާތަކުން އިންތިހާބު ކުރާ ތިން މެންބަރުންނެވެ.

އެ ކޮމިޝަންގެ ރައީސް އާއި ނައިބު ރައީސް އައްޔަން ކުރުމުގެ ބާރު ވެސް ރައީސަށް ދެއްވާފައިވާއިރު، ރައީސް އެ ދެ މަގާމަށް ބޭފުޅުން ހަމަޖައްސަން ޖެހެނީ ކޮމިޝަންގެ މެންބަރުންގެ ތެރެއިން، މަޖިލީހުގެ ރުހުމާ އެކުގައެވެ.

މި ބިލާއިގުޅިގެން ނޫސްވެރިންނާއި ބައެއް އެހެން ފަރާތްތައް ވެސް ކަންބޮޑުވުން ފާޅުކުރަމުންދާއިރު، އެ ބިލަށް ސަރުކާރުން ތާއީދުނުކުރާ ކަމަށާއި މަޖިލީހުން އެ ބިލު ބޭރުކުރާނެ ކަމަށް ރައީސް ޑރ. މުހައްމަދު މުއިއްޒު ވެސް ވަނީ ވިދާޅުވެފައެވެ.