މޭރީ ގްރޭސްއޮނެޑް ޕިނެޑާގެ މަރުގެ މައްސަލައިގައި ޝަރީއަތް ނިމެންދެން ބަންދުކޮށްފައި ހުރި ހަލީމަތު ލަމްހާ ބަންދުން ދޫކޮށްލި މައްސަލަ ހައިކޯޓުގައި އިސްތިއުނާފުކޮށްފިއެވެ.

އައިޖީއެމްއެޗުގައި މަސައްކަތް ކުރި ފިލިޕީންސްގެ ނަރުހެއް ކަމަށްވާ މޭރީގެ މަރުގެ މައްސަލައިގާ ލަމްހާ ހައްޔަރު ކުރީ 2021 ވަނަ އ3ަހަރުގެ ޑިސެމްބަރ 16 ގައެވެ. އެއަށްފަހު، 23 ނޮވެމްބަރ 2023 ގައި ޝަރުތުތަކާއެކު ދޫކޮށްލުމަށް އެދުމުން ކްރިމިނަލް ކޯޓުން އޭނާ ބަންދުން ދޫކޮށްލިއެވެ.

އެހެންނަމަވެސް، ޕްރޮސިކިއުޓަރ ޖެނެރަލް އޮފީހުން އެ މައްސަލަ ހައިކޯޓުގައި އިސްތިއުނާފުކުރުމާއެކު ހައިކޯޓުގެ އަމުރަށް އަލުން އޭނާ ބަންދުކުރިއެވެ.

އެއަށްފަހު ޝަރީއަތްތައް ލަސްވަމުންދާތީ ލަމްހާ ބަންދުން ދޫކޮށްލުމަށް އޭނާ އެދިފައި ވަނިކޮށް މިދިޔަ އަންގާރަ ދުވަހު ކްރިމިނަލް ކޯޓުން ވަނީ އޭނާ ބަންދުން ދޫކޮށްފައެވެ. އޭނާ ބަންދުން ދޫކުރުމަށް މިފަހަރު ކްރިމިނަލްކޯޓުން ނިންމާފައި ވަނީ ތިން މަސް ދުވަހުގެ މުއްދަތަކަށެވެ.

ލަމްހާ ދޫކޮށްލި ޝަރުތުތަކުގެ ތެރޭގައި ރާއްޖެއިން ފުރައިގެން ނުދިއުމަށާއި ކޯޓުން އަންގާ ކޮންމެ ވަގުތެއްގައި ކޯޓަށް ގަޑިއަށް ހާޟިރުވުމަށާއި ޒަރޫރީ ބޭނުމެއްގައި ނޫނީ ގެއިން ބޭރަށް ނުދިއުން ހިމެނެއެވެ.

ލަމްހާގެ މައްޗަށް ދައުލަތުން ކޮށްފައިވަނީ އެނގިހުރެ މީހަކު މެރުމުގައި ބައިވެރި ވުމުގެ ދައުވާއާއި އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތެއްގައި ބާރު ހިންގުމުގެ ކުށުގެ ދައުވާ އާއި ހުއްދަ ނަގައިގެން ކުރަންޖެހޭ ކަމެއް ހުއްދަ ނުނަގާ ކުރުމުގެ ދައުވާއެވެ.

މޭރީ މަރާލި ކަމުގެ ތުހުމަތުގައި އޭނާގެ ފިރިމީހާ މާވިން އެސް ވައި ވާގަސް ހައްޔަރު ކުރީ 2021 ވަނަ އަހަރުގެ އޮކްޓޯބަރު 27 ގައެވެ. އޭނާގެ މައްޗަށް ކުރަނީ އެނގިހުރެ މީހަކު މެރުމުގެ ކުށުގެ ދައުވާއެވެ.