ތާސްކުޅުމާއި ބަދިގެ ޖަލްސާތައް ހުއްޓާލާ ރަނގަޅު ނުވަތަ އަސްލު މަސައްކަތެއް ކުރުމަށް ކުރީގެ ނައިބު ރައީސް އަހްމަދު އަދީބު ގޮވައިލައްވައިފިއެވެ.

އެމަނިކުފާނު މިފަދައިން ގޮވައިލެއްވީ ޕީއެންއެފް އިން ކުރިއަށް ގެންދިޔަ ފްރަންޓް އޮފީސް ޖަލްސާގައި ކުރީގެ ރައީސް އަބްދުﷲ ޔާމީން އަބްދުލްގައްޔޫމް ދެއްކެވި ވާހަކަފުޅުތަކަށް ރައްދުދެއްވަމުންނެވެ.

ރައީސް ޔާމީން ވިދާޅުވީ އަދީބު ދުބާއީގައި ހުންނަވައިގެން ފްރަންޓު އޮފީހުގެ ޖަލްސާތަކަށް ފާޑުކިޔުއްވައި، ބޭރުގެ ބައެއް ނޫސްތަކަށް މައުލޫމާތު ދެއްވާ ކަމަށެވެ. އަދި އެއީ އެ ނޫސްތަކަށް ފައިސާދެއްވައިގެން ކުރައްވާ ކަންކަން ކަމަށް ވެސް ވިދާޅުވިއެވެ.

މީގެއިތުރުން ޓޫރިޒަމްގެ ހުރިހައި ކަމެއްގެ އާކިޓެކްޓަކީ އަދި މުޅި އިގްތިސާދުގެ މޭސްތިރިއަކީ ވެސް އަދީބުކަމަށް ވިދާޅުވަމުން އަންނަކަމަށް ވެސް ރައީސް ޔާމީން ވިދާޅުވިއެވެ.

"ދެންމެތިވިދާޅުވީ ނޫންތޯ 50 މިލިއަން ޑޮލަރު ހޯދިޔޭ އެކުއިޒިޝަން ކޮސްޓްގޮތަށް. އެއީ މިތާ އެއޮތް ފަޅު އެނގޭތޯ. އެ ފަޅަކީ އޭރު އީވައިސީގަ އަޅުގަނޑުމެން ވާހަކަދައްކާފަ ގާތްގަޑަކަށް ހައެއްކަ އަށެއްކަ ރިސޯޓު ހިއްކާލާފަ ހަދަން ވިސްނާފަ އޮތްތަނެއް. މިހާރު އަދީބު ބައްލަވަން އިންނަވާނެ. މިއީ ދިވެހިރައްޔިތުންނަށް އެނގިލަންޖެހޭ ވާހަކަ." ރައީސް ޔާމީން ވިދާޅުވިއެވެ.

އެމަނިކުފާނު އިތުރަށް ވިދާޅުވީ އަދީބަކީ މިހާރުގެ ސަރުކާރަށް ވެސް މާލީ އެޑްވައިސްދެއްވާ ބޭފުޅަކަށްވާއިރު، އަބޫދާބީ އާއި ދުބާއީން ވެސް އިތުރަށް ތަރައްގީކުރަން އަދީބު ކޮންސަލްޓެންޓަކަށް ހަޔަރކޮށްގެން ކަަމަށް ހީފުޅުވާ ކަމަށެވެ.

ރައީސް ޔާމީން ވަނީ އެ ވިދާޅުވި ސޭންޑްބޭންކު ނުވަތަ ލެގޫން އޮތީ، އަދީބު ނުއަގުގައި ރަށްތަކާއި ފަޅުތައް ނުއަގުގައި ވިއްކަމުން ގޮސް 3 ނުވަތަ 4 ބިލިއަން ޑޮލަަރަށް ވިއްކާލާފައި ކަމަށެވެ. އެތަން ވިއްކާލީ ތައިލެންޑު ކުންފުންޏަކަށް ކަމަށާއި އެމީހުން އެ ސިޓީ ހިފައިން ރައީސް ޔާމީންގެ އަރިހަށް އައި ކަަމަށް ވެސް ވިދާޅުވިއެވެ.

މިކަމާއިގުޅިގެން ރައީސް ޔާމީންގެ ވީޑިއޯ އާއެކު އަދީބު ހިއްސާކުރެއްވި ޕޯސްޓުގައި ވަނީ ތާސްކުޅުމާއި ބަދިގެ ޖަލްސާތައް ހުއްޓާލާ ރަނގަޅު ނުވަތަ އަސްލު މަސައްކަތެއް ކުރުމަށް އެދިލައްވާފައެވެ. އަދި އެހެން މީހުންނަށް ޖެލަސް ނުވުމަށް ވެސް އެދިވަޑައިގެންފައި ވެއެވެ.