މި ސަރުކާރުން މައުލޫމާތު ލިބިގަތުމުގެ ހައްގަށް އިހުމާލުވެފައިނުވާނެ ކަމުގައި ޕީއެންސީން ބުނެފިއެވެ.

ޕީއެންސީން ނެރުނު ނުސްބަޔާނެއްގައި ބުނީ ޒިންމާދާރު އިދިކޮޅު ސިޔާސީ ޕާޓީއެއްގެ މަގާމު އަދާކުރަންޖެހޭ އެމްޑީޕީއަކީ ދައުލަތުން ފައިސާދީގެން ހިންގާ މުއައްސަސާއެއް ކަމަށްވާއިރު، ހަގީގަތް އޮޅޭގޮތަށް އެ ޕާޓީން މައުލޫމާތު ފެތުރުމަކީ ބަލައިގަނެވޭނެ ކަމެއް ނޫން ކަމަށެވެ.

ދޮގު މައުލޫމާތު ފެތުރުން ޕީއެންސީން ކުށްވެރިކޮށް، އެ ބަޔާނުގައި ވަނީ ސަރުކާރަށް އަހަރުދުވަސްވީއިރު، ކުރެވުނު ބައެއް މުހިންމު މަސައްކަތްތައް ވެސް ފާހަގަކޮށްފައެވެ. އެގޮތުން މިދިޔަ އަހަރުދުވަހުގެ ތެރޭގައި ސަރުކާރު ހިންގާފައިވަނީ ޒިންމާދާރުކަމާއެކު ރައްޔިތުންގެ މާލިއްޔަތަށް އަމާނާތްތެރިކަމާއެކު، ހާމަކަން ބޮޑު ގޮތެއްގައި ރައްޔިތުންނަށް ހުރިހާ މައުލޫމާތެއް ފޯރުކޮށްދީގެން ކަމަށް ވަނީ ބުނެފައެވެ.

ޕީއެންސީން ބުނީ ރާއްޖޭގެ ތާރީޚުގައި ފުރަތަމަ ފަހަރަށް ކެބިނެޓުން ނިންމާ ނިންމުންތައް އާންމުންނަށް ފެންނާނެހެން އާންމުކުރަން ފެށީ މި ސަރުކާރުން ކަމަށެވެ. އަދި މި އަހަރުގެ މާރޗު މަހުންފެށިގެން ކެބިނެޓުގެ ކޮންމެ ނިންމުމެއް އެ ކަމަށް ހާއްސަ ވެބްސައިޓެއްގައި އަދާހަމަކޮށް ޝާއިއުކުރަމުން އަންނަކަަމަށް ވެސް ބުނެފައި ވެއެވެ.