ސަރުކާރަށް އެއްބާރުލުންދީގެން މަސައްކަތްކުރުމަކީ ހުރިހައި އެންމެންގެ ޒިންމާއެއް ކަމުގައި ކުރީގެ ރައީސް ޑރ. މުހައްމަދު ވަހީދު ހަސަން ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ އަދުގެ ސަރުކާރަށް އެއް އަހަރުވުމާއި ގުޅިގެން، ސަރުކާރުގެ ސިޔާސަތުތަކާގުޅޭގޮތުން ދެއްވި ސްޓޭޓްމަންޓެއްގައެވެ.

އެ ސްޓޭޓްމެންޓުގައި 2023 ވަނަ އަހަރު ރިޔާސީ ދައުރު ބަދަލުވީއިރު، ރާއްޖެއަށް ކުރިމަތިވެފައިވާ ގިނަ މައްސަލތަކެއް ހުރިކަން ފާހަގަކުރައްވައި، އޭގެތެރޭގައި ހާރިޖީ، ދާހިލީ އަދި އިގްތިސާދީ ގޮތުން ގޮންޖެހުންތަކެއް ހުރިކަމަށް ވިދާޅުވިއެވެ.

"ދައުރު ބަދަލުވީއިރު ބައެއް ގައުމުތަކާމެދު ދިވެހީންގެ ހިތްހަމަނުޖެހުންތަކެއް ހުރި. އިންޑިއާ އާއެކުއޮތް ޒަމަންވީ ގުޅުމާމެދު ވެސް ސުވާލުތަކެއް ވަނީ އުފެދިފަ. ޗައިނާ އާއެކު އޮތް ގުޅުންވެސް އެހާ ރަނގަޅެއްނޫން." ޑރ. ވަހީދު ވިދާޅުވިއެވެ.

އެެހެންނަމަވެސް ރައީސް ޑރ. މުޙައްމަދު މުޢިއްޒު ރާއްޖޭގެ ވެރިކަމަށް ވަޑައިގެން މާގިނަ ދުވަހެއްނުވެ، އެގުޅުންތައް ބަދަހިކުރަން ގިނަ މަސައްކަތްތަކެއް ކުރެވިކަމަށާއި އޭގެ ނަތީޖާ ވެސް ރަނގަޅުކަމަށް ވިދާޅުވިއެވެ.

ރައީސް ވަޙީދު އިތުރަށް ވިދާޅުވީ ރައީސް ޑރ. މުޢިއްޒު ވެރިކަމަށް ވަޑައިގެންނެވިއިރު ރާއްޖެއޮތީ އިގްތިސާދީގޮތުން ވަރަށް ދަތި ފައްތަރެއްގައި ކަމަށެވެ. ނަމަވެސް ރައްޔިތުންނަށް އުފުލަންޖެހޭ ބުރަ ލުއިކުރުމަށް ސަރުކާރުން ގިނަގުނަ މަސައްކަތްތަކެއް ކުރައްވަމުންކަމަށް ވެސް އެމަނިކުފާނު ވިދާޅުވިއެވެ.

އެގޮތުން ދައުލަތުގެ ޚަރަދުތައް ކުޑަކޮށް، އާމްދަނީ އިތުރުކޮށް، އައު މަޝްރޫއުތައް ފެށުމަށް ސަރުކާރުން ގިނަގުނަ މަސައްކަތްތަކެއް ކުރަމުންދާކަން ފާހަގަކުރެއްވިއެވެ. އަދި އިގްތިސާދީ ގޮތުން ސަރުކާރުން އަޅަމުންދާ ފިޔަވަޅުތަކަކީ ފަސޭހަ ފިޔަވަޅުތަކެއް ނޫން ކަމަށާއި، އެކަމަކު ސަރުކާރަށް އެއްބާރުލުންދީގެން މަސައްކަތްކުރުމަކީ ހުރިހައި އެންމެންގެ ޒިންމާއެއްކަމަށް ރައީސް ޑރ. މުޙައްމަދު ވަޙީދު ޙަސަން ވިދާޅުވިއެވެ.