ރައީސް ޑރ. މުޙައްމަދު މުޢިއްޒު ކުރިން ވިދާޅުވިގޮތާ ހިލާފަށް، ސިޔާސީ ޕާޓީތަކުގެ މަޝްވަރާއާ ނުލައި ގާނޫނުއަސާސީއަށް ގިނަ ބަދަލުތަކެއް ގެނެސްފައިވާތީ ދަ ޑިމޮކްރެޓްސް އިން ކަންބޮޑުވުން ފާޅުކޮށްފިއެވެ.

އެޕާޓީން އާންމުކުރި ބަޔާނެއްގައި ވަނީ ގާނޫނުއަސާސީއަށް ބަދަލުތައް ގެންނަވާނީ ސިޔާސީ ޕާޓީތައް ޝާމިލުކޮށް ފުޅާމިނެއްގައި މަޝްވަރާކޮށްގެންކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކުރިން ވިދާޅުވުމަށްފަހު އެއާ މުޅިން ހިލާފަށް ޢަމަލުކުރައްވާފައިވާ ކަަމަށެވެ.

އެ ބަޔާނުގައި އިތުރަށް ބުނީ އެ ޕާޓީން މީގެ ކުރިންވެސް ރައްޔިތުންގެ މަޖިލީހުގައި ވަކާލާތުކޮށްފައި ވާނީ، އާންމު ރައްޔިތުންގެ ވޯޓުން އިންތިހާބުކޮށްފައިވާ މެމްބަރަކު، ޕާޓީއަކުން ކަނޑާލުމުން އެ މެމްބަރެއްގެ ގޮނޑި އޮޓޮމެޓިކުން ގެއްލިދާގޮތްވުމަކީ ހަމަޖެހޭ އުސޫލެއް ނޫންކަމުގައެވެ.

"ސަރުކާރުން ގާނޫނުއަސާސީއަށް ހުށަހަޅާފައިވާ އަނެއް ބަދަލުގައިވާ ގޮތުން، ކުރު ރާސްތާއާއި، މެދު ރާސްތާއާއި އަދި ދިގު ރާސްތާގެ ޕްލޭންތައް އެކުލަވާލުމުގެ އިހުތިޔާރު ރައީސުލްޖުމްހޫރިއްޔާއަށް ލިބިދީފައިވެއެވެ." އެ ބަޔާނުގައި ވެއެވެ.

މީގެއިތުރުން އެކަން ކުރުމުގައި އެހެން އެއްވެސް ފަރާތެއްގެ ޝާމިލުވުމެއް ރުހުމެއް ނުވަތަ ރައްޔިތުންގެ މަޖިލީހުން ފާސްކުރުމެއް އޮންނަން ޖެހޭނޭކަމަށް ބަޔާންކޮށްފައި ނުވާކަން ކަންބޮޑުވުމާއެކު ފާހަގަކޮށްފައި ވެއެވެ. އަދި އެއިރެއްގައި ވެރިކަމުގައި ހުންނަވާ ރައީސުލްޖުމްހޫރިއްޔާއަކު އެފަދަ ޕްލޭނެއް އެކުލަވާލުމުން، ދެން އެއަށް އިންތިހާބުކުރެވޭ ރައީސުން އެއަށް ތަބާވާންޖެހޭކަމެއް ނުވަތަ ނޫންކަމެއް ވެސް އެނގެން ނެތްކަން ވެސް ފާހަގަކުރިއެވެ.

އެހެންކަމުން ސަރުކާރުން ކުރިން ބުނިގޮތަށް ގާނޫނުއަސާސީއަށް ގެނެވޭ ބަދަލުތަކުގެ މަޝްވަރާތައް ފުޅާ ދާއިރާއެއްގައި ބާއްވައި، އެކަމުގައި ސިޔާސީ ޕާޓީތަކާއި އާންމު ރައްޔިތުން ޝާމިލުކުރުމަށް އެ ޕާޓީން ވަނީ ސަރުކާރަށް ގޮވާލާފައެވެ.