މި ސަރުކާރުގެ އަމާޒުހުރީ އެންމެ ކުދިކުދި އާބާދީތަކުގައި ވެސް ދިރިއުޅޭ ރައްޔިތުންނަށް އެކަށީގެންވާ ފެންވަރު ރަނގަޅު ހިދުމަތެއް ފޯރުކޮށްދިނުމަށްކަމަށް ހެލްތު މިނިސްޓަރ ޢަބްދުﷲ ނާޒިމް އިބްރާހިމް ވިދާޅުވެއްޖެއެވެ.

ޕީއެސްއެމް ނިއުސްގެ "ހަފްތާ 52" ޕްރޮގްރާމުގައި ވާހަކަދައްކަވަމުން މިނިސްޓަރު ވަނީ ރީޖަނަލް ހޮސްޕިޓަލްތަކުގެ ހިދުމަތްތައް ފުޅާކުރުމަށް ކުރެވޭ މަސައްކަތްތަކާއި، އެއަރ އެމްބިއުލާންސްގެ ހިދުމަތް ތައާރަފުކުރުން ފާހަގަކުރައްވާފައެވެ. އަދި ކޮލެޓީ ބޭސް ރާއްޖެއަށް ގެނައުމަށްޓަކައި ކުރަންޖެހޭ މަސައްކަތްތައް ފެށިފައިވާކަން ވެސް ފާހަގަކުރެއްވިއެވެ.

" އެންމެންވެސް ގަބޫލުކުރާ ހަގީގަތަކީ ވަރަށް ކުދިކުދި އާބާދީތަކުގައި ބޮޑެތި ހޮސްޕިޓަލްތައް ގާއިމުނުކުރެވޭނެކަން. އެކަމަކު ކަށަވަރުކުރަން ބޭނުންވަނީ ވަށާޖެހޭ ނިޒާމެއްގެ ތެރެއިން މި އެންމެންނަށް ސިއްހީ ފަރުވާ ލިބޭނެކަން. ރައީސް ޑރ. މުޢިއްޒުގެ ސިޔާސަތުތައް ބައްޓަންކުރެވިފައިވަނީ އެބީދައިން." މިނިސްޓަރު ވިދާޅުވިއެވެ.

މީގެއިތުރުން ސިއްހީ ދާއިރާއިން ފޯރުކޮށްދެވޭ ހިދުމަތްތަކުގެ ފެންވަރު މަތިކުރުމަށް ކުރެވޭ މަސައްކަތްތަކާ އެކުއެކީ، ހުއްޓިފައި ނުވަތަ މަޑުޖެހިފައި ހުރި މަޝްރޫއުތައް ވެސް އަލުން ހިނގައިގަތުމަށް ކުރަންޖެހޭ މަސައްކަތްތައް ކުރަމުންދާކަން ވަނީ ފާހަގަކުރައްވާފައެވެ.

ހަމަމިއާއެކު އާސަންދަ ނިޒާމު ހަރުދަނާކުރުމަށް މި ސަރުކާރުން ފަށަށާފައިވާ މަސައްކަތްތަކާއެކު އެ ނިޒާމުގެ ތެރެއިން ހުރި ބާގަނޑުތައް ދެނެގަނެވި، ކުރެވޭ އިސްރާފު ބޮޑުތަނުން ސަލާމަތްކުރެވޭނެކަމަށް ވެސް ވިދާޅުވިއެވެ.