ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) ގެ ފަރާތުން އިންތިޒާމްކޮށްގެން ކުރިއަށްގެންދާ އާޓް އެކްޒިބިޝަން މިއަދު ހަވީރު ފެށުމަށް ތައްޔާރުވެއްޖެެއެވެ.

"ރެދަން އާރޓް އެކްޒިބިޝަން" ގެ ނަމުގައި ކުރިއަށްގެންދާ އާޓް އެކްޒިބިޝަން، އިފްތިތާހުކުރުމުގެ ރަސްމިއްޔާތު ކުރިއަށްދާނީ މިއަދު ހަވީރު 3:45 ގައި ނެޝަނަލް އާރޓް ގެލެރީގައެވެ.

މިއީ އެމްއެންޔޫގެ ފެކަލްޓީ އޮފް އާރޓްސްގެ ދަރިވަރުންގެ އުފެއްދުންތެރިކަމާއި ހުނަރުވެރިކަން ދައްކާލުމަށް އިންތިޒާމްކޮށްފައިވާ މައުރަޒެކެވެ. މި މައުރަޒު ނޮވެމްބަރ މަހުގެ 21 ން ފެށިގެން 24 ވަނަ ދުވަހުގެ ނިޔަލަށް ކުރިއަށްދާނެއެވެ.

މިއިން ކޮންމެ ދުވަހެއްގެ ވެސް ހަވީރު 4:30 ން ރޭގަނޑު 10 ޖަހަންދެން ނެޝަނަލް އާޓް ގެލެރީއަށް ޒިޔާރަތްކޮށް، "ރެދަން އާރޓް އެކްޒިބިޝަން" އަށް ހުށަހަޅާފައިވާ ކުރެހުންތަށް ބަލައިލުމުގެ ފުރުސަތު އާންމުނަށް ވަނީ ހުޅުވާލައިފައެވެ.