ކޮޕް29 ސަމިޓުގެ މިނިސްޓީރިއަލް ބައްދަލުވުމުގައި އެންވަޔަރްމެންޓް މިނިސްޓަރ ތޯރިގް އިބްރާހިމް ބައިވެރިވެވަޑައިގެންފިއެވެ.

މި ބައްދަލުވުން ބާއްވާފައިވަނީ އ.ދ. ގެ މޫސުމަށް އަންނަ ބަދަލުތަކާގުޅޭ މުއާހަދާގެ 29 ވަނަ ބައްދަލުވުމުގެ (ކޮޕް29) ހަވާސާގައެވެ.

މިއީ އެ ބައްދަލުވުމުގެ ރިޔާސަތުން އިންތިޒާމްކޮށްގެން ފަތުރުވެރިކަމުގެ ދާއިރާގައި މޫސުމަށް އަންނަ ބަދަލުތަކާއި ދެކޮޅަށް ކުރާ މަސައްކަތްތައް ހަރުދަނާކުރުމާއި ގުޅޭގޮތުން ބޭއްވި މިނިސްޓީރިއަލް ބައްދަލުވުމެކެވެ.

މިނިސްޓަރު ވަނީ މޫސުމަށް އަންނަ ބަދަލުތަކާއި ދެކޮޅަށް ދެމެހެއްޓެނެވި ފަތުރުވެރިކަން ކުރިއަރުވާ ތަރައްގީކުރުމަށް ރާއްޖެއިން ކުރަމުންގެންދާ މަސައްކަތްތަކާ ގުޅޭ ގޮތުން ތަގުރީރުކުރައްވާފައެވެ.

އެމަނިކުފާނު ވަނީ ރާއްޖެއިން ފަތުރުވެރިކަމުގެ ދާއިރާގައި މޫސުމަށް އަންނަ ބަދަލުތަކަށް ހޭނުމަށް ކުރަމުންގެންދާ މަސައްކަތްތަކާއި ރާވާފައިވާ މަސައްކަތްތަކަށް އަލިއަޅުވާލައްވާފައެވެ.

މިގޮތުން ކަނޑޫފާފަދަ ކަރބަން ހިފަހައްޓާ މާހައުލުތައް ރައްކާތެރިކުރުމާއި އާލާކުރުމަށް ރާއްޖެއިން ކުރަމުންގެންދާ މަސައްކަތްތައް ފާހަގަކުރެއްވިއެވެ. އަދި ރާއްޖޭގެ ފަތުރުވެރިކަމުގެ ދާއިރާގާ ހަރަކާތްތެރިވާ ފަރާތްތަކާއި ރަށު ފެންވަރުގައި ކުރަމުންގެންދާ އެކި މަސައްކަތްތައް ވެސް ފާހަގަކުރެއްވިއެވެ.

މިއީ ކޮޕްގެ ހަވާސާގައި ފަތުރުވެރިކަމާ މޫސުމަށް އަންނަ ބަދަލުތަކާ ގުޅޭ ގޮތުން މިނިސްޓީރިއަލް ފެންވަރުގައި ބޭއްވި ފުރަތަމަ ބައްދަލުވުމެވެ.