ދުޅަހެޔޮ އާއިލާތަކެއް ރާއްޖޭގައި ޤާއިމްކުރެވިގެންދާނީ މުޖުތަމަޢުގެ ހުރިހާ ފަރާތްތަކެއް އެކުގައި މަސައްކަތް ކުރެވިގެންކަމަށް ސޯޝަލް މިނިސްޓަރ ޑރ. ޢާއިޝަތު ޝިހާމް ވިދާޅުވެއްޖެއެވެ.

އެކަމަނާ މިފަދައިން ވިދާޅުވީ ފެމިލީ ޕްރޮޓެކްޝަން އޮތޯރިޓީ (އެފް.ޕީ.އޭ) އިން ބާއްވާ މަދަނީ ޖަމުޢިއްޔާތަކުގެ ދެ ދުވަހުގެ މަހާސިންތާގެ ހުޅުވުމުގެ ރަސްމިއްޔާތުގެ ޝަރަފުވެރި މެހެމާނެއްގެ ބައިވެރިވެވަޑައިގެން ވާހަކަ ދައްކަވަމުންނެވެ.

މިނިސްޓަރު ވިދާޅުވީ މި ދާއިރާގައި މަސައްކަތްކުރާ، ރާއްޖޭގެ އެކި ކަންކޮޅުތަކުގައި ހަރަކާތްތެރިވާ މަދަނީ ޖަމްޢިއްޔާތަކުގެ އެހީތެރިކަމާއި އެއްބާރުލުމަކީ، ސަރުކާރުގެ މި އަމާޒަށް ވާސިލުވުމަށް ލިބިގެންދާ ވަރަށްބޮޑު ހިތްވަރެއް ކަމަށެވެ.

މިގޮތުން ރާއްޖޭގެ އެކި ކަންކޮޅުތަކުގައި އަނިޔާ ލިބޭ ފަރާތްތަކަށް ބޭނުންވާ ތަފާތު އެހީތެރިކަމާއި ހިދުމަތްތައް ފޯރުކޮށްދޭނެ ގާބިލު ޖަމްޢިއްޔާތައް އުފެދި، ހަރަކާތްތެރިވަމުން ދާކަން ފާހަގަކުރެއްވިއެވެ. އަދި އަނިޔާ ލިބޭ ފަރާތްތަކަށް ބޭނުންވާ އިޖުތިމާޢީ، އިޤްތިޞާދީ، މާލީ އަދި ޤާނޫނީ އެހީތެރިކަން ފޯރުކޮށްދޭ ޖަމްޢިއްޔާތަކަކީ ޒަމާނުއްސުރެން ރާއްޖޭގައި އެކިފެންވަރުގައި ހަރަކާތްތެރިވަމުންދާ އަދި މިހާރުވެސް އެފަދަ ހިދުމަތްތައް ފޯރުކޮށްދިނުމުގައި ޢަމަލީގޮތުން މަސައްކަތް ކުރާ ފަރާތްތައްކަން ފާހަގަކޮށް އެފަދަ އެންމެހައި ފަރާތްތަކަށް ވަޒީރު ވަނީ ޝުކުރުއަދާކުރައްވާފައެވެ.

މީގެއިތުރުން އެޗްޕީއޭ އިން ކުރިއަށްގެންދާ މި މަހާސިންތާގެ ތެރެއިން އަނިޔާގެ ޝިކާރައަކަށްވާ ފަރާތްތަކަށް އެހީތެރިކަން ފޯރުކޮށްދިނުމަށް އެކި ގޮތްގޮތުން ހަރަކާތްތެރިވާ ޖަމްޢިއްޔާތަކާއި ދައުލަތުގެ އިދާރާތަކާއި ދެމެދު އޮންނަ ގުޅުން އިތުރަށް ހަރުދަނާވެ، ގުޅިގެން އެކުގައި މަސައްކަތް ކުރެވޭނެ ގޮތްތަކެއް ތައާރަފްވެ، ގާއިމުވެގެން ދާނެކަމަށް އުންމީދުކުރައްވާކަމަށް ވެސް ވިދާޅުވިއެވެ.

ހަމަމިއާއެކު އެންމެން ގުޅިގެން މަސައްކަތްކޮށްފިނަމަ، ވަކި ޖިންސަކަށް ވީތީ ކުރާ އަނިޔާ ހުއްޓުވި، މި މުޖުތަމަޢަކީ އެކުވެރި، ހަމަހަމަ އަދި އޯގާތެރި މުޖްތަމަޢެއްގެ ގޮތުގައި ބިނާކުރެވި، އަންނަން އޮތް ޖީލުތަކަށް ފަޚުރުވެރިވެވޭފަދަ ގައުމެއްގެ ގޮތުގައި މި ގައުމު ދޫކޮށްލެވޭނެކަމުގެ ޔަގީންކަން ވެސް މިނިސްޓަރު ވަނީ ދެއްވާފައެވެ.