ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ) ބޯޑުގެ މެމްބަރުންގެ ސަސްޕެންޝަން އުވާލައިފިއެވެ.

ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ވިދާޅުވީ ހައުސިންގ ޑިވެލޮޕްމަންޓް ކޯޕަރޭޝަންއަށް އައު މެނޭޖިންގ ޑިރެކްޓަރެއް އައްޔަންކޮށްފައިވާތީ، އެ ކުންފުނީގެ ޑިރެކްޓަރުންގެ ބޯޑުގެ މެންބަރުން ސަސްޕެންޑް ކުރުމަށް ނިންމި ނިންމުން މިއަދުން ފެށިގެން ނިމުމަކަށް ވަނީ ގެނެވިފައިވާ ކަމަށެވެ.

އެ ބޯޑުގެ ޗެއަރމަން އަހުމަދު ނާސިފް ފިޔަވައި ހުރިހައި މެމްބަރުން ސަސްޕެންޑުކޮށްފައިވަނީ އެޗްޑީސީ އާ ގުޅޭގޮތުން ދިވެހި ފުލުހުންގެ ހިދުމަތުން މިހާރުކުރަމުންދާ ޖިނާއީ ތަހުގީގަކާ ގުޅިގެންނެވެ. ޕީސީބީން އެ ބޭފުޅުން ސަސްޕެންޑުކުރީ އެ ތަހުގީގަށް ޖާގަދީ، ފުރިހަމަ އެހީތެރިކަން ދިނުމުގެ ގޮތުންނެވެ.

އެޗްޑީސީ ޑިރެކްޓަރުންގެ ބޯޑުގައި ހިމެނިވަޑައިގަންނަވަނީ އަޒްހަރު އަބްދުﷲ ސައީދު، އިބްރާހީމް ޔޫސުފްފުޅު، މުޙައްމަދު ވިޝާމް، އުލާ މުޙައްމަދު ރަޝީދު، އާރިފް އަބްދުލް ސަމަދު، މުޙައްމަދު ނާޖިލް، މުޙައްމަދު ވަހީދު، ފާތިމަތު މިޒްނާ އަލީ، އަދި ޔޫސުފް ވަހީދު އެވެ.