އިޒްރޭލުގެ ޕާސްޕޯޓުގައި ރާއްޖެއައުން މަނާކުރެވޭނީ އަރަބި ގައުމުތަކުގެ ބަހެއް ހޯދައިގެން ކަމުގައި ޕީއެންސީގެ ޕާލިމަންޓްރީ ގްރޫޕުގެ ލީޑަރު އިބްރާހިމް ފަލާހް ވިދާޅުވެއްޖެއެވެ.

އިޒްރޭލު ޕާސްޕޯޓު މަނާކުރަން ނިންމައި، ސަރުކާރުން ޖޫން މަހުގެ ދެވަނަ ދުވަހު އެކަން އިއުލާން ކުރުމުން ގިނަބައެއްގެ ތައުރީފު ލިބިފައިވާއިރު، އިޒްރޭލު ޕާސްޕޯޓު މަނާކުރަން އިމިގްރޭޝަންގެ ގާނޫނަށް އިސްލާހު ގެނައުމަށް ގަލޮޅު ދެކުނު ދާއިރާގެ އެމްޑީޕީގެ މެންބަރު މީކާއިލް އަހުމަދު ނަސީމް އޮތީ މަޖިލީހަށް ބިލެއް ވެސް ހުށަހަޅާފައެވެ.

ޕީއެންސީގެ ވެސް ފުރިހަމަ ތާއީދާ އެކު، އޭރު އެ ބިލު މަޖިލީހުން ބަލައިގަނެ ސަލާމަތީ ހިދުމަތްތަކާ ބެހޭ ކޮމިޓީ ނުވަތަ 241 ކޮމިޓީ އަށް ފޮނުވީ ޖޫން 10 ގައެވެ. ސަރުކާރަށް ނިސްބަތްވާ މެންބަރުން ވެސް އެކަމަށް ތާއީދުކުރެއްވި ނަމަވެސް ކޮމިޓީގައި އެ ބިލު އޮތީ ތާށިވެފައެވެ.

ކޮމިޓީއަށް މި މައްސަލަ ފުރަތަމަ އެޖެންޑާކުރީ މި ހިނގާ ނޮވެމްބަރ މަހު 12 ވަނަ ދުވަހުއެވެ. އެ މައްސަލައިގައި ކޮމިޓީގައި ވާހަކަދައްކަވަމުން މެމްބަރު ފަލާހް މިއަދު ވިދާޅުވީ، އިޒްރޭލުގައި ވެސް ލައްކަ މުސްލިމުން އުޅޭ ކަމަށާއި މި މައްސަލަ އަވަސް އަރުވައިލާފައި ނިންމައިގެން ނުވާނެ ކަމަށެވެ.

މީގެއިތުރުން ސިޔާސީ މަންފާއެއް ހޯދުމުގެ ބޭނުމުގައި މިކަން ކޮށްގެން ނުވާނެ ކަމަށާއި އެކަމުގައި ފަލަސްތީނުގެ ބަހެއް ވެސް ހޯދަންޖެހޭ ކަމަށް ވަނީ ވިދާޅުވެފައެވެ.

އެހެންވެ މި މައްސަލައާ މެދު ކޮމިޓީން ގޮތެއް ނިންމުމުގެ ކުރިން ވަރަށް ފުޅާ ދާއިރާއެއްގައި މަޝްވަރާކުރަންޖެހޭ ކަމަށް ވަނީ ވިދާޅުވެފައެވެ.