ގއ. ވިލިނގިލީގައި އިސްރަށްވެހިންގެ ހަވީރެއް ބާއްވައިފިއެވެ.

މިއީ ގއ. ފެމިލީ އެންޑް ޗިލްޑްރަން ސަރވިސް ސެންޓަރުން އިންތިޒާމުކޮށްގެން ބޭއްވި ހަވީރެކެވެ.

މި ހަވީރު ބާއްވާފައިވަނީ ވަކި ޖިންސަކަށް ވީތީ ކުރާ އަނިޔާ އާއި ދެކޮޅަށް އަޑުއުފުލުމުގެ ގޮތުން ފާހަގަ ކުރާ 16 ދުވަހުގެ ކެމްޕެއިން ކަމަށްވާ "16 ޑޭޒް އޮފް އެކްޓިވިޒަމް" ތެރެއިން، 10 ޑިސެމްބަރުގައެވެ.

މި ހަވީރު ކާމިޔާބުކަމާއެކު ބޭއްވުމަށްޓަކައި ވިލިނގިލީ އަންހެނުންގެ ތަރައްޤީއަށް މަސައްކަތްކުރާ ކޮމިޓީއާއި، ގއ. އަތޮޅު ހޮސްޕިޓަލްގެ އިތުރުން، ވިލިނގިލީ ކައުންސިލް އަދި ވިލިނގިލީ ޕޮލިސް ސްޓޭޝަންގެ ފަރާތުން ވަނީ ވަރަށް ބޮޑު އެއްބާރުލުމެއް ދެއްވާފައެވެ.

އުފާވެރި ޢާއިލާއެއް ދެމެހެއްޓުމަށްޓަކައި ޢާއިލާގެ ދޮށީ އުމުރުގެ ފަރާތްތަކާއެކު ވަގުތު ހޭދަކޮށް އެފަރާތްތަކަށް އަޅާލުމާއި ލޯބި ދިނުމަކީ ވަރަށް މުހިންމު ކަމެއްގެ ގޮތުގައި އެ ސެންޓަރުން ވަނީ ފާހަގަކޮށްފައެވެ.

ގިނަ އަދަދެއްގެ ޢާއިލާތަކާއި އިސްރަށްވެހިން ބައިވެރިވި މި ހަވީރު ވެގެންދިޔައީ ޢާއިލާތަކާއެކު އުފާވެރި ވަގުތުކޮޅެއް ހޭދަކޮށްލުމަށް ލިބުނު ފުރުސަތަކަށެވެ.