ރައީސް ޑރ. މުޙައްމަދު މުޢިއްޒުގެ ވައުދުފުޅުގައި ހިމެނޭ 5 މިލިއަން ގަސް އިންދުމުގެ ޕްރޮގްރާމަށް ސްޓެލްކޯ އިން މިހައިތަނަށް 50،000 އަށްވުރެ ގިނަ ގަސް އިންދައިފިއެވެ.

އެ ކުންފުނިން ހާމަކުރައްވާފައިވާ ތަފާސްހިސާބުން ދައްކާގޮތުގައި ކޮންމެމަހަކު ވެސް 8340 ގަސް ގެންދަނީ އިންދަމުންނެވެ. އަދި މިހައިތަނަށް 52،334 ގަސް އިންދާފައި ވެއެވެ.

ރައީސްގެ މި ވައުދުފުޅު ފުރިހަމަކުރުމަށް އެންމެފުރަތަަމަ އިސްނެގި ކުންފުނިތަކުގެ ތެރޭގައި ވެސް ސްޓެލްކޯ ހިމެނޭއިރު، މިކަމުގެ އާރުކާޓީއަކަށް ހުންނެވީ މެނޭޖިންގ ޑިރެކްޓަރ ޙުސައިން ފަހުމީއެވެ.

އެމްޑީ ވިދާޅުވެފައިވަނީ ރައީސްގެ ކޮންމެ ވައުދުތަކަކީ ވެސް މިހާރުގެ ޖީލުތަކާއި އަންނަން އޮތް ޖީލުތަކުގެ ފައިދާއަށް ވިސްނުންތެރިކަމާއެކު ތައްޔާރު ކޮށްފައިވާ ވައުދުތަކެއް ކަމަށެވެ. އަދި ބައިބައިވުން ދޫކޮށް ގައުމުގެ ކުރިއެރުމަށް މަސައްކަތްކުރުމަށް ވެސް އެމްޑީ ވަނީ ގޮވާލަައްވާފައެވެ.

ރައީސް ޑރ. މުޢިއްޒުގެ ރިޔާސީ ފުރަތަމަ ދައުރުގެ ތެރޭގައި 5 މިލިޔަން ގަސް އިންދުމަށް އެމަނިކުފާނު ވައުދުވެވަޑައިގެންނެވީ މިދިޔަ އަހަރުގެ ޑިސެންބަރު މަހުގެ 1 ވަނަ ދުވަހު ކޮޕް-28 ސަމިޓުގައި ދެއްވި ތަގުރީރުގައެވެ.