ހައުސިންގ ޑިވަލޮޕްމެންޓް ކޯޕަރޭޝަން (އެޗްޑީސީ) ގެ މުވައްޒަފުންތަކެއް ވަޒީފާއިން ވަކިކޮށްފިއެވެ.

ރައީސް ޑރ. މުޙައްމަދު މުޢިއްޒު މިކަން ހާމަކުރައްވައި، މީޑިއާ އަށް ވިދާޅުވީ އެޗްޑީސީން ބައެއް ފަރާތްތައް މިއަދު ވަކިކޮށްފައިވާ ކަމަށެވެ. އަދި ސަރުކާރުގެ އެއްވެސް މުއައްސަސާއެއްގައި ކޮރަޕްޝަނަށް މަގުފަހިވާކަމެއް ކުރަން ފުރުސަތު ލިބެން އެމަނިކުފާނު ބޭނުންފުޅު ނުވާކަމަށް ވެސް ވިދާޅުވިއެވެ.

" އެހެން ކުންފުންޏެއްގައިވެސް އެކަހަލަ ކަމެއް ހިނގާކަން އަޅުގަނޑު ފުރުސަތެއް ނުދޭނަން."

ބައެއް މަސްދަރުތަކުން ހާމަކޮށްފައިވާ ގޮތުގައި އެޗްޑީސީގެ 15 މުވައްޒަފެއް ވަނީ ވަޒީފާއިން ވަކިކޮށްފައެވެ. ނަމަވެސް މިކަމާއިގުޅިގެން އެ ކުންފުނީގެ ބަހެއް އަދިހާމައެއް ނުކުރެއެވެ.

މި މުވައްޒަފުން ވަކިކޮށްފައި މިވަނީ ބިންވެރިޔާ ސްކީމްގެ ގޯތި ނުލިބޭ ބަޔަކަށް ގޯތި ލިބުނުކަމުގެ ލިޔުން ދޫކުރި މައްސަލައެއް ފެންމަތިުވެ، އެކަމުގެ ތަހުގީގު ހިނގަމުން ދަނިކޮށްނެވެ.