މަގާމުތަކަށް މީހުން އައްޔަންކުރަނީ އަމާނާތްތެރިކަމާއެކު ރައްޔިތުންނަށް ހިދުމަތް ދިނުމަށް ކަމުގައި ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު ވިދާޅުވީ މަގާމުތަކަށް މީހުން އައްޔަން ކުރައްވަނީ ކޮރަޕްޝަން ހިންގަން ނޫން ކަމަށާއި ގަވާއިދާއި ހިލާފުކަމެއް ކުރަން ވެސް ނޫން ކަމަށެވެ.

"އަޅުގަނޑު ވުޒާރާތަކަށް މީހުން އައްޔަނުކުރަނީ ވައްކަން ކުރާކަށް ނޫން. އޭގެ ބަދަލުގައި ތެދުވެރިކަމާއި އަމާނާތްތެރިކަމާއެކީ ރައްޔިތުންނަށް ޚިދުމަތް ދިނުމަށް."

ރައީސް ވިދާޅުވީ އެކަމަށް ހުރަސް އެޅޭގޮތަށް، ނުވަތަ އެނޫންގޮތަކަށް ކަމެއްކުރާކަމަށް ގަބޫލުކުރެވޭނަމަ އެތަނުން، އެމީހަކު ދުރުކުރައްވައި، އެކަން ހުއްޓުވާނެ ކަމަށެވެ.

މީގެއިތުރުން ރައީސް ވަނީ ކޮރަޕްޝަން ބަލައިނުގަންނާނެކަން ސަރުކާރުގެ ކުންފުނިތަކުގެ ވެރިންނަށް ވެސް އަންގަވާފައެވެ. އެފަދަ އެއްވެސް ޢަމަލެއް ހިންގައި ނުވަތަ އެފަދަ ކަމަކަށް މަގުފަހިކޮށްދިންކަން އެމަނިކުފާނަށް އެނގިވަޑައިގަންނަވާ ހިސާބުން ވަގުތުން ފިޔަވަޅު އަޅުއްވާނެކަމަށް ވަނީ ވިދާޅުވެފައެވެ.

މި ސަރުކާރުން ބޭނުންވަނީ ރައްޔިތުންގެ ކުރިއެރުމާއި ފާގަތިކަމަށް ސީރިއަސް މަސައްކަތް ކުރަންކަމަށާއި ކޮރަޕްޝަނަށް މަގުފަހިވާފަދަ އެއްވެސް ކަމެއް ކުރުމުގެ އެއްވެސް ފުރުސަތެއް މި ސަރުކާރުން ނުދެއްވާނެކަމުގެ ޔަގީންކަން ވެސް އެމަނިކިުފާނު ގެންދަވަނީ ތަކުރާރުކޮށް ދިވެހި ރައްޔިތުންނަށް ދެއްވަމުންނެވެ.

އެފަދަކަމެއް ކުރާ ފަރާތެއް ފެނިއްޖެނަމަ ޚުދު އެމަނިކުފާނު އިސްވެ، އެކަމަށް ފިޔަވަޅު އަޅުއްވާނެކަން ވެސް ތަކުރާރުކޮށް އެތައް މަންސަތަކެއްގައި ގެންދަވަނީ ވިދާޅުވަމުންނެވެ.