ފާއިތުވި އަހަރުތަކުގައި ރާއްޖެއަށް ކުރިމަތިވި ގޮންޖެހުންތަކުގައި އޮމާނުން ވެދެއްވި އަގުހުރި އެހީތެރިކަމަށް ރާއްޖޭގެ ފޮރިން މިނިސްޓަރ ޑރ. ޢަބްދުﷲ ޚަލީލު ޝުކުރުއަދާ ކުރައްވައިފިއެވެ.

އެމަނިކުފާނު ޝުކުރުއަދާކުރެއްވީ އޮމާންގެ ޑެޕިއުޓީ ޕްރައިމް މިނިސްޓަރ ފޯ އިންޓަރނޭޝަނަލް ރިލޭޝަންސް އެންޑް ކޯޕަރޭޝަން އެފެއާޒް އެންޑް ސްޕެޝަލް ރެޕްރެސެންޓެޓިވް އޮފް ހިޒް މެޖަސްޓީ، ހިޒް ހައިނަސް ސައްޔިދު އަސްޢަދް ބިން ޠާރިޤް އަލް-ސަޢީދުގެ އަރިހަށް ކުރެއްވި އިހްތިރާމުގެ ޒިޔާރަތުގައެވެ.

ފޮރިން މިނިސްޓަރުގެ އޮމާނަށް ކުރައްވަމުންގެންދަވާ ރަސްމީ ދަތުރުފުޅުގެ ތެރެއިން ބޭއްވި މި ޒިޔާރަތުގައި، ރައީސް ޑރ. މުޙައްމަދު މުޢިއްޒުއާއި ދިވެހި ރައްޔިތުންގެ ނަމުގައި އޮމާންގެ އިސް ވެރިންނާއި ރައްޔިތުންނަށް، މިނިސްޓަރ ޑރ. ޚަލީލް ތަހުނިޔާ އަރިސްކުރެއްވިއެވެ.

ހިޒް ހައިނަސް ސައްޔިދު އަސްޢަދް ބިން ޠާރިޤް އަލް-ސަޢީދު، މިނިސްޓަރ ޑރ. ޚަލީލަށް މަރުހަބާ ވިދާޅުވެ، ރާއްޖެއާއެކު އޮތް ގާތް ގުޅުން އިތުރަށް ބަދަހިކުރުމަށް މަސައްކަތްކުރައްވާނޭކަމުގެ ޔަގީންކަން ދެއްވިއެވެ.

ޑރ. ޚަލީލު ވަނީ އޮމާނު ސަރުކާރުން ރާއްޖެއާމެދު ބަހައްޓަވާ ގާތްކަން ފާހަގަކުރައްވައި، ދެ ގައުމުގެ މަސްލަތު ހިމެނޭ ކަންކަމުގައި އެއްބާރުލުން އިތުރުކުރުމާބެހޭގޮތުން ދެ ބޭފުޅުން ވަނީ ހިޔާލު ބަދަލުކުރައްވާފައެވެ. އަދި ދެ ގައުމުން ގުޅިގެން މަސައްކަތްކުރެއްވުމަށް ވެސް އެއްބަސްވެވަޑައިގަތެވެ.

މި ބައްދަލުކުރެއްވުމުގައި މިނިސްޓަރ ޑރ. ޚަލީލްގެ އަރިހުގައި ސެކްރެޓަރީ، ބައިލެޓަރަލް، ޑރ. ހާލާ ހަމީދާއި ސީނިއަރ އަންޑަރ ސެކްރެޓަރީ ފާޠިމަތު ނަޢީމާ އަދި އެސިސްޓަންޓް ޑިރެކްޓަރ މުޙައްމަދު ޝުޖާޢު ބައިވެރިވެވަޑައިގެންނެވިއެވެ.