ސަރުކާރުން ޓެކްސީ ޑްރައިވަރުންގެ ކަންބޮޑުވުންތަކުގެ އަޑުއެހުމަށާއި ސަރުކާރުން ޓެކްސީކުރަން އުޅޭއުޅުން މިހާރުން މިހާރަށް ހުއްޓާލުމަށް ދަ ޑިމޮކްރެޓްސް ޕާޓީން ސަރުކާރަށް ގޮވާލައިފިއެވެ.

އެ ޕާޓީން މިފަދައިން ގޮވާލާފައި މިވަނީ ޓެކްސީ ދުއްވާ ފަރާތްތަކުން ޑިސެމްބަރ 11 ވަނަ ދުވަހު ކުރި އިހުތިޖާޖުގައި ބައެއް ޓެކްސީތައް ޓޯވކޮށް، ބައެއް ޑްރައިވަރުން ފުލުހުންގެ ބެލުމުގެ ދަށަށް ގެނައުމާއި ގުޅިގެން އެކަން ކުށްވެރިކޮށް ނެރުނު ނޫސްބަޔާނެއްގައެވެ.

އެ ބަޔާނުގައި ވަނީ ޓެކްސީ ދުއްވާ ފަރާތްތަކުން އިހުތިޖާޖުކުރުމާއެކު ސަރުކާރަށް ތަކުރާރުކޮށް އިލްތިމާސްކޮށް ގޮވާލަމުންދާ ގޮވާލުންތަކަށް ސަރުކާރުން ބީރުކަންފަތެއްދީ ގޮންޖަހަމުން ގެންދާގެންދިއުން އެ ޕާޓީން ބަލައިނުގަންނަ ކަމަށާއި އެކަން ކުށްވެރިކުރާ ކަމަށެވެ.

"ޓެކްސީ ދުއްވާ ފަރާތްތަކުން އިއްޔެ ހަވީރު އިހްތިޖާޖުކޮށްފައިވަނީ އެފަރާތްތަކުގެ އާމްދަނީއާއި ދިރިއުޅުމާ ގުޅިފައިވާ ސީރިއަސް މައްސަލައަކާ ގުޅިގެންކަން މި ޕާޓީން ގަބޫލުކުރަމެވެ." އެ ބަޔާނުގައި ވެއެވެ.

މީގެއިތުރުން އާމްދަނީ ހޯދުމަށް އާންމު ފަރާތްތަކުން ދޭ ހިދުމަތްތަކުގެ ތެރެއަށް ސަރުކާރުން ވަންނަމުން ގޮސް އެންމެ ފަހުން ސަރުކާރުން ޓެކްސީ ކުރަން ފެށުމަކީ ޓެކްސީގެ ހިދުމަތް މިހާތަނަށް ފޯރުކޮށްދެމުން ގެންދިޔަ ޓެކްސީ ސެންޓަރުތަކަށާއި ޑްރައިވަރުންނަށް އިންތިހާއަށް ގެއްލުންވެ، އެ ފަރާތްތަކުގެ އާމްދަނީ ހުއްޓިގެންދާނޭކަމެއް ކަމަށް އެ ޕާޓީން ދެކޭ ކަމަށް ވެސް ބުނެފައި ވެއެވެ.

ދަ ޑިމޮކްރެޓްސް އިން ބުނީ މި ކަމުގައި އިހުތިޖާޖްކުރި ޓެކްސީ ޑްރައިވަރުންގެ ތެރެއިން ބަޔަކު ހައްޔަރުކުރުމާއި ޓެކްސީތައް ޓޯކުރުމަކީ މި މައްސަލައަށް އޮތް ހައްލުކަމުގައި ނުދެކޭ ކަމަށެވެ.