ހައުސިންގ މިނިސްޓްރީގައި ރޯވި އަލިފާން އަދިވެސް ކޮންޓްރޯލު ނުވާ ކަމަށް އެމްއެންޑީއެފް އިން ވިދާޅުވެއްޖެއެވެ.

އެ އިދާރާ އިން މި ހާދިސާގެ އަދާހަމަ ދެއްވަމުން ވިދާޅުވީ އެ އިމާރާތުގެ ވަށައިގެންވާ އެހެން އިމާރާތްތަކުން މީހުން ހުސްކޮށްފައިވާ ކަމަށާއި މިހާރު ބޮޑަށް މަސައްކަތް ކުރަމުންދަނީ އެހެން އިމާރާތްތަކަށް އަލިފާން ފޯރިޔަ ނުދިނުމަށް ކަމަށެވެ.

މީގެއިތުރުން އެއަރޕޯޓުގެ ފަޔަރ ފައިޓަރސް ގެ އެހީތެރިކަން ލިބެމުން އަންނަކަަމަށް ވެސް ވަނީ ވިދާޅުވެފައެވެ.

ހައުސިންގ މިނިސްޓްރީ ހުންނަ މ. ގްރީން ބިލްޑިންގ ގައި އަލިފާނުގެ ހާދިސާއެއް ހިނގުމާއި ގުޅިގެން ސަމާލުކަން ދޭންވީ ކަންތައްތައް އެޗްޕީއޭ އިން ވަނީ ހަނދާންކޮށްދެއްވާފައެވެ.

އެގޮތުން ކޮންމެހެން ނުކުންނަން ޖެހިއްޖެ ހާލަތެއްގައި މެނުވީ ދުމުގެ އަސަރުކޮށްފައިވާ ސަރަހައްދަކަށް ނުކުތުމުގެ ކުރިން އަނގައާއި ނޭފަތް ނިވާކުރުމަށާާއި އެންމެރަނގަޅު ގޮތަކީ ދުމުގެ އަސަރުކޮށްފައިވާ ސަރަހައްދަށް ނުނިކުތުން ކަމުގައި ވަނީ ވިދާޅުވެފައެވެ.

މީގެއިތުރުން ނޭވާލާ ނިޒާމާއި ހިތުގެ ބަލިތައް ހުންނަ ފަރާތަތްކަށް ދުމުގެ ސަބަބުން ކުރާ ނޭދެވޭ އަސަރު ބޮޑުވުން އެކަށީގެންވާ ކަމަށާއި ގޭގެ ދޮރުތަކާއި ކުޑަދޮރުތައް، ދުން ނުވަންނާނެހެން ބަންދުކުރުމަށް ވެސް އެ އިދާރާ އިން ވަނީ އިލްތިމާސް ކުރައްވާފައެވެ.

ނޭވާ ކުރުވުން، ނޭވާލާން އުނދަގޫވުން، ގަދަޔަށް ކެއްސުން އަދި ބޯ އެނބުރުން ފަދަ އަލާމާތެއް ފެނިއްޖެނަމަ ލަސްނުކޮށް ސިއްހީ އެހީތެރިއެއްގެ ލަފާ ހޯދުމަށް ވެސް އެޗްޕީއޭ އިން ވަނީ އިލްތިމާސް ކުރައްވާފައެވެ.