ރާއްޖޭގައި ހާލުގައި ޖެހިފައިވާ އިންޑިއާ މީހުންނަށް ވަރަށް އަވަހަށް ފައިސާ ދޭނެކަން ރާއްޖޭގައި ހުންނަ އިންޑިއާ ހައިކޮމިޝަނުން ހާމަކޮށްފިއެވެ.

'ނިއުއިންޑިއާއެކްސްޕްރެސް' ގައި ހާމަކޮށްފައިވާ ގޮތުގައި ރާއްޖޭގައި ހާލުގައި ޖެހިފައިވާ އޯޑިޝާ މަސައްކަތްތެރިންނަށް ދޭންޖެހޭ ފައިސާ ދޭއް ނުވަތަ ތިން ދުވަހުގެ ތެރޭގައި ދޫކުރާނެކަން ވަނީ ހާމަކޮށްފައެވެ. އަދި އެއަށްފަހު، އެމީހުންނަށް އިންޑިއާއަށް އެނބުރި ދެވޭނެކަން ހާމަކޮށްފައި ވެއެވެ.

ރެނާޓަސް ނަމަކަށް ކިޔާ ކޮންސްޓްރަކްޝަން ކުންފުންޏަކުން ރާއްޖެ ގެނައި މަސައްކަތްތެރިންނަށް އެކުންފުނިން، އެ މީހުންނަށް ވަރަށް އިހާނެތިކޮށް ކަންކަން ކުރަމުން އަންނަކަން ފަޅާއަރާފައިވަނީ އެމީހުން މީސްމީޑިއާ އަށް ދޫކޮށްފައިވާ ވީޑިއޯ މެސެޖަކުންނެވެ.

މި ވީޑިއޯ މެސެޖާއި ގުޅިގެން ހައި ކޮމިޝަނުން، ކުންފުނީގެ ވެރިންނާ ހިއްސާކޮށްފައިވާ ކަމަށް ވެސް އެ ނޫހުގައި ވަނީ ބުނެފައެވެ. އަދި އެ ކުންފުނީގެ ޕްރޮޖެކްޓް މެނޭޖަރާއި ހަވާލާދީ ބުނެފައިވަނީ އެކުންފުނީގެ ގަން ޕްރޮޖެކްޓް ސައިޓުގައި މަސައްކަތްކުރަމުން އައި އެމީހުންނަށް ނުލިބިވާ މުސާރަ ދިނުމަށް އެދި އިހުތިޖާޖުކުރަމުންދާ ކަމަށެވެ.

އޭގެތެރޭގައި ހިމެނެނީ އޯޑިޝާގެ 35 މީހުންނާއި ތަމިލްނާޑޫގެ 4 މީހުން ކަމަށް ވެސް ބުނެފައި ވެއެވެ.

މީގެ އިތުރުން އެ މަސައްކަތްތެރިން ވަނީ ޑިސެމްބަރު 5 ގައި ކުންފުނިން ވަކިވެފައި ކަމަށާއި އެމީހުންނަށް ނުލިބިވާ އެއް މަހުގެ މުސާރަ ދެތިން ދުވަހުގެ ތެރޭގައި ދޭނެކަަމަށް އޮފިޝަލާއި ހަވާލާދީ ބުނެއެވެ.

ހައި ކޮމިޝަނުން އެ ބިދޭސީ މަސައްކަތްތެރިންނާ ވެސް ގުޅާލާފައިވާ ކަމަށާއި، އެމީހުން މައުލޫމާތު ދީފައިވަނީ އެ ސައިޓުގައި ޖުމްލަ 196 އިންޑިއާ މަސައްކަތްތެރިން ތިބި ކަމަށް ކަމުގައި 'ނިއުއިންޑިއާއެކްސްޕްރެސް' ގައި ވަނީ ބުނެފައެވެ.

ނިއުއިންޑިއާއެކްސްޕްރެސްގެ ލިންކް: https://www.newindianexpress.com/amp/story/states/odisha/2024/Dec/25/odia-workers-in-maldives-will-be-back-soon-high-commission