ކަސްޓަމްސްއިން ހިފަހައްޓާފައިވާ މިޔަރު އަދި މަޑިމަސްތަކެއް ނައްތާލައިފިއެވެ.

މިއީ ނެތިދިއުމުގެ ބިރުހީވެފައިވާ ދިރޭތަކެތީގެ ބައިނަލްއަގްވާމީ ވިޔަފާރި ކޮންޓްރޯލްކުރުމުގެ ގާނޫނުގެ ދަށުން ރާއްޖެއިން ބޭރުކުރުން މަނާތަކެތި ހުރިކަމަށް ލިބުނު މައުލޫމާތަކާއި ގުޅިގެން، ކަސްޓަމްސްއިން ބަލައިފާސްކުރުމުގެ ތެރޭގައި ދެނެގަނެވިފައިވާ ތަކެއްޗެވެ.

މިގޮތުން ބަލައިފާސްކުރެވުނު ކޮންޓެއިނާގެ ތެރެއިން ހިފެހެއްޓުނު 582 ކިލޯގެ މިޔަރު އަދި މަޑިމަސް މިހާރު ވަނީ ކަސްޓަމްސްގެ ބެލުމުގެ ދަށުން ނައްތާލެވިފައެވެ. މި ތަކެތި ނައްތާލާފައިވަނީ ޑިސެމްބަރ 22 ވަނަ ދުވަހު ކ. ތިލަފުށި ކުނި ނައްތާލާ ސަރަހައްދުގައެވެ.

ދިވެހިރާއްޖޭގެ މަސްވެރިކަމުގެ އާންމު ގަވާއިދުގެ 7 ވަނަ ބާބު (ހިފުމާއި، ބޭނުމާއި، ނެގުމާއި، މެރުން މަނާ ބާވަތްތަކާއި، އެކްސްޕޯޓް ކުރުން މަނާ ބާވަތްތައް) ގެ 17 ވަނަ މާއްދާގެ (ބ) ގެ 2 ވަނަ ނަންބަރުގެ ދަށުން ދިވެހިރާއްޖެއިން ބޭރުކުރުން މަނާ ތަކެއްޗެވެ.