ރާއްޖެއަށް މިހާރު ކުރަމުންދާ ވިއްސާރަ އަންނަ ހަފުތާގެ ހޮނިހިރު އަލިކުރަން ފަށާނެކަމަށް މެޓް އޮފީހުން ބުނެފިއެވެ.

މިއަދާއި މާދަމާ ވެސް މުޅި ރާއްޖެއަށް ވިއްސާރަކުރާނެކަމަށް ލަފާކޮށްފައިވާއިރު، ދެކުނުގެ ބައެއް ރަށްތަކަށް ކެރީގެ އަސަރު ކުރުން އެކަށީގެންވާ ކަމަށާއި އެހެން ހިސާބުތަކަށް ވިއްސާރަކުރުމާއެކު ގުގުރާނެކަމަށް އެ އޮފީހުން ލަފާކުރެއެވެ. އަދި ބައެއް ރަށްތަކަށް ބޯކޮށް ވާރޭ ވެހޭނެކަމަށް ވަނީ ބުނެފައެވެ.

މީގެއިތުރުން ދެކުނާއި މެދުރާއްޖޭގެ ރަށްތަކަށް ހުޅަނގާއި ހުޅަނދު އުތުރުން ގަޑިއަކު 15 މޭލާއި 25 މޭލާއި ދެމެދުގެ ބާރުމިނުގައި ވައިޖެހޭއިރު، އުތުރުގެ ރަށްތަކަށް ވައިޖެހޭނީ އުތުރާއި އިރުއުތުރުން، ގަޑިއަކު 10 މޭލާއި 20 މޭލާއި ދެމެދުގެ ބާރުމިނުގައި ކަމަށް ލަފާކުރެއެެވެ. އަދި ވިލާގަނޑުގައި ގަޑިއަކު ގާތްގަނޑަކަށް 45 މޭލަށް ވައިގަދަވާނެކަމަށް ބެލެވޭ ކަމަށް ވަނީ ބުނެފައެވެ.

އެހެންވެ، ކަނޑު ދަތުރުކުރައްވާ ފަރާތްތަކުން ސަމާލުވުމަށް ވަނީ އިލްތިމާސްކޮށްފައެވެ.

ރާއްޖެއަށް ކުރާމުން މިދާ ވިއްސާރައިގާ ވޭތުވެދިޔަ 24 ގަޑިއިރު އެންމެގިނައިން ވާރޭ ވެހިފައިވަނީ ހައްދުންމަތީ މާވަށަށެވެ. އެއީ 107.7 މިލިމީޓަރުގެ ވާރެއެވެ.