ރާއްޖެ އާއި އިންޑިއާއާ ދެމެދު މިވަގުތު އޮތީ ވަރަށް ވަރުގަދަ ގުޅުމެއް ކަަމަށާއި އެ ގުޅުމަށް ބުރުއަރާނެ އެއްވެސް ކަމަކަށް ސަރުކާރުން ޖާގައެއް ނުދޭނެ ކަމަށް ފޮރިން މިނިސްޓަރ ޑރ. ޢަބްދުﷲ ހަލީލު ވިދާޅުވެއްޖެއެވެ.

އެ މަނިކުފާނު މިފަދައިން ވިދާޅުވީ އިންޑިއާ އަށް މިހާރު ކުރައްވަމުން ގެންދަވާ ދަތުރުފުޅުގައި އެގައުމުގެ 'ވިއޯން' ނޫހަށް ދެއްވި ބަސްދީގަތުމެއްގައެވެ.

އެ ބަސްދީގަތުމުގައި މި ސަރުކާރުން އިންޑިއާއާ ދެކޮޅު އެއްވެސް ކަމަކަށް ފުރުސަތު ނުދޭނެ ކަމަށާއި އެހެންނަމަވެސް ސަރުކާރުގައި ވެސް، ސަރުކާރުގެ ސިޔާސަތުތައް ކަމުނުދާ މީހުން އުޅޭނެކަން ވިސްނަންޖެހޭނެ ކަމަށް ވިދާޅުވިއެވެ. އަދި އެ ފަދަ މީހުން ޖަޒުބާތުގައި ދައްކާ ވާހަކައަކީ ސަރުކާރުގެ ސިޔާސަތު ނޫންކަން ވެސް ވިސްނަން ޖެހޭނެކަމަށް މިިސްޓަރު ވަނީ ވިދާޅުވެފައެވެ.

މީގެއިތުރުން ކޮންމެ ގައުމަކާއެކުވެސް ރާއްޖެއިން ބާއްވާ ގުޅުމުގައި ރާއްޖެއިން ބޭނުންވާ ކަންކަން ވަރަށް ހާމަކަން ބޮޑުކޮށް ބުނެދޭނެ ކަމަށާއި ހާއްސަގޮތެއްގައި އިންޑިއާއާ އަށް އެކަން މާބޮޑަށް ބުނެދޭނެކަމަށް މިނިސްޓަރު ވިދާޅުވިއެވެ.

މިނިސްޓަރު ހަލީލު ވަނީ 'އިންޑިއާ އައުޓު’ ގެ ނަމުގައި ހިންގި ހަރަކާތަކީ ކުރީގެ ރައީސް އަބްދުﷲ ޔާމީން އަބްދުލްގައްޔޫމު އިސް ނަންގަވައިގެން ކުރިއަށް ގެންދެވި ހަރަކާތެއް ކަމަށާއި އެމަނިކުފާނަކީ ވެރިކަން ކުރާ ޕީއެންސީ އާ ވެސް ދުރުގައި ހުންނެވި ބޭފުޅެއްކަން ފާހަގަކުރައްވާފައެވެ.

ހަމަމިއާއެކު އެމެރިކާގެ ވޮޝިންޓަން ޕޯސްޓުގައި އިންޑިއާ އިން ރާއްޖޭގެ ވެރިކަން ބަދަލުކުރުމަށް ރޭވުންތަކެއް ރޭވިކަމަށް ބުނެ ލިޔެފައިވާ ރިޕޯޓަކީ ވެސް މުޅިން ދޮގު ރިޕޯޓެއް ކަމަށާއި އެކަމުގައި ހަގީގަތެއް ނެތްކަމަށް ވެސް ވަނީ ވިދާޅުވެފައެވެ.