ޖަނަވަރީ 3 ވަނަ ދުވަހު ރާއްޖެއަަށް ކުރި ވިއްސާރައިގާ ލިބުނު ގެއްލުންތައް ބެލުމަށް އެސެސްމެންޓެއް ހަދަން ނިންމާފައިވާކަމަށް ޑިޒާސްޓަރ މެނޭޖުމެންޓު އޮތޯރިޓީ (އެންޑީއެމްއޭ) އިން ވިދާޅުވެއްޖެއެވެ.

އެ އޮތޯރިޓީން ވިދާޅުވީ ގެއްލުންލިބުނު ގެތަކަށް މާދަމާ ގޮސް އެސެސްމެންޓު ހަދަން ފަށާނެ ކަމަށެވެ. އަދި އެސެސްމެންޓުގެ ކުރިން ގެތަކުގެ ވެރިފަރާތުން ލިބުނު ގެއްލުންތައް ދެނެގަތުމުން ވަގުތުކޮޅެއް ދޭނެ ކަމަށާއި އެއީ އެ އިދާރާގެ އެސެސްމެންޓު ފުރިހަމަކުރުމަށް ފަސޭހައަކަށް ކަމަށް ވެސް ވިދާޅުވިއެވެ.

މީގެއިތުރުން މާލެއަށް ކުރި ވިއްސާރާގައި ފެންބޮޑުވުމުގެ ސަބަބުން ވަގުތީ ބޯހިޔާވަހިކަން ފޯރުކޮށްދެވުނު ފަރާތްތަކުން، އެފަރާތްތަކުގެ ދިރިއުޅެމުންއައި ތަން އާންމު ހާލަތައް ގެނައުމަށް މަސައްކަތްކުރަމުން އަންނަކަް ވެސް ވަނީ ހާމަކުރައްވާފައެވެ.

މިފަރާތްތަކަށް ވަގުތީ ބޯހިޔާވަހިކަން ދިނީ ދެ ދުވަހުގެ މުއްދަތަށް ކަމަށް ވެސް އެންޑީއެމްއޭ އިން ވަނީ ވިދާޅުވެފައެވެ.

މާލޭގައި ފެންބޮޑުވުމުގެ ސަބަބުން އެހީތެރިކަމަށް އެދި 774 ތަނަކުން ރިޕޯޓްކުރި ކަމަށާއި 226 މީހުންނަށް ބޯހިޔާވަހިކަން ފޯރުކޮށްދީފައިވާ ކަމަށް ވެސް އެ އޮތޯރިޓީން ވަނީ ވިދާޅުވެފައެވެ.